БИШКЕК, 14-ноя. — Sputnik. Бишкекте мөөнөтү өтүп кеткен сыр, колбаса азыктарын сатып жүргөн ишкер колго түшүрүлгөнүн УКМК билдирди.
Маалыматка караганда, К.С.В. жана М.Р.А. аттуу ишкерлер иштеткен Бишкектеги "Маслосырбазанын" кампалары тинтүүгө алынган.
"Жыйынтыгында ал жерде мөөнөтү эбак эле өтүп кеткен азыктарга жаңыртылган мөөнөт жазылган этикетка чапталып, ири соода түйүндөрүнө сатылып турганы аныкталган. Мындан тышкары, өлкөнүн бажы жана салык органдары тарабынан эсепке алынбаган чет элдик жана жергиликтүү өндүрүүчүлөрдүн товарлары табылган", — деп жазылат кабарда.
УКМК мындай аракеттер биринчи кезекте элдин саламаттыгына зыян келтирип, мамлекеттин экономикасын олуттуу чыгымга учуратарын кошумчалаган.
"Мөөнөтү өткөн товарлардын баары конфискацияланып, тиешелүү тартипте жок кылынат. Бул кылмыш иши боюнча К.С.А. аттуу жаран кармалып, Бишкек ШИИББнын убактылуу кармоочу жайына киргизилди", — деп айтылат маалыматта.
Учурда мөөнөтү өтүп кеткен бул тамак-аш азыктарын Кыргызстандын аймагына алып кирүүгө уруксат берген кызмат адамдарын аныктоо иштери жүрүп жатканы кошумчаланды.