БИШКЕК, 11-ноя. — Sputnik. Бишкекте автобустун айдоочуларына талаптар күчөтүлөрүн мэрия маалымдады.
Эми автобус айдап иштеген адамга карата бир айда үчтөн ашык арыз түшсө жумуштан бошотулат.
Бүгүн Бишкек жүргүнчүлөр автотранспорттук ишканасында мэрдин орун басары Максатбек Сазыкуловдун катышуусунда кеңешме өткөн. Анда автобустардын ылдамдыгын чектөө программасын орнотуу чечими кабыл алынды. Ага ылайык, эми шаардагы автобустардын ылдамдыгы саатына 60 чакырымдан ашпайт. Жаңы программа ылдамдыкты гана чектебестен, катуу токтотууну, GPS-трекерин мыйзамсыз өчүрүүнү, айдоочулардын айдоо ыкмасын көзөмөлдөөгө мүмкүндүк берет.
Сазыкулов жол эрежесин, ылдамдыкты сактабай, жүргүнчүлөргө орой мамиле жасап, бир айда үчтөн ашык эреже бузган айдоочуларды иштен бошотууга чейинки тиешелүү жаза чараларын көрүүгө ишкана жетекчилерин милдеттендирген.