БИШКЕК, 10-ноя. — Sputnik. Бишкекте россиялык жана советтик жогорку окуу жайлардын Кыргызстандагы бүтүрүүчүлөрүнүн форуму өтүп жатат.
Иш-чара Кыргыз-Россия Славян университети, Россотрудничествонун өкүлчүлүгү, КРдеги россиялык окуу жайлардын бүтүрүүчүлөрүнүн ассоциациясы жана РФ элдер достугу университети тарабынан уюштурулган.
Форумдун ачылышында КРСУнун ректору Денис Фомин-Нилов Кыргызстанда россиялык окуу жайлардын бүтүрүүчүлөрү иштеп, карьера жасап жатканын айтты. Ал университет Россиянын жана Кыргызстандын үлгүсүндөгү эки диплом берерин эске салды.
"КРСУ Россия менен Кыргызстандын билим берүүдөгү интеграциясынын белгиси болуп калды. Биздин профессордук-окутуучулук курамда квалификациясын жогорулатып же Россиядан кайра даярдоодон өтүп Бишкекке кайтып келген кесиптештер абдан көп. Алар Кыргызстандын келечеги үчүн эмгектенип жатышат. Бүгүнкү форум университеттин 30 жылдыгын белгилөөнүн алкагында өтүүдө", — деди Фомин-Нилов.
Жогорку, орто кесиптик жана жогорку окуу жайдан кийинки билим берүү башкармалыгынын жетекчиси Азамат Найманбаев Кыргызстан менен Россия билим берүү тармагында майнаптуу кызматташып жатканын белгиледи. Анын айтымында, РФтин жогорку окуу жайларына квота боюнча акысыз билим алууга суроо-талап жогору бойдон калууда.