БИШКЕК, 16-окт. — Sputnik. Улуттук банк ар кандай өлчөмдөгү 500 сомдук жаңы купюралар боюнча түшүндүрмө берди.
Буга чейин көлөмү ар кандай болгон эки 500 сомдук жаңы купюра соцтармакта кызуу талкуу жараткан. Жаңы сериядагы банкнота ушул жылдын майында жүгүртүүгө киргизилген.
Улуттук банк видеодо көрсөтүлгөн ар кандай өлчөмдөгү купюраларды банкка өткөрүп берүүнү өтүнгөн.
"Бул банкноталар тиешелүү экспертизадан өткөндөн кийин гана маалымат берилет", — деп жазылат билдирмеде.
Улуттук банк улуттук валюталар эл аралык сапат стандарттары боюнча гана даярдала турганын белгилеп, алардын сапаты банкнота чыгарып жаткандагы ар бир этап сайын текшерилерин кошумчалаган.
"Эгер сизде күмөн жараткан банкнота же монета болуп калса, укук коргоо органдарына же Улуттук банкка өткөрүп берүүнү өтүнөбүз. Ал жактан тиешелүү адистер экспертиза жүргүзөт. Ал үчүн акы алынбайт. Банкнота беш иш күн ичинде текшерилет", — деп айтылат маалыматта.
Улуттук банк күмөн жараткан банкноталарды жана улуттук валютанын монеталарын экспертизага дүйшөмбүдөн жумага чейин саат 9:00дөн 15:00гө чейин кабыл аларын кошумчалады.