БИШКЕК, 17-сен. — Sputnik. Түркиянын Тышкы иштер министрлиги Анкараны жаш балдарды согушка азгырат деп айыптаган АКШнын Мамлекеттик департаментинин докладын кескин сындады. Бул тууралуу РИА Новости жазды.
Буга чейин Мамдепартамент Түркияны жаш балдарды аскер катары колдонгон өлкөлөрдүн катарына кошкон.
"Жаш балдарды Сирия жана Ирактагы терактыларга катышууга азгырган РПК/YPG террордук уюмуна (Түркияда тыюу салынган Күрдстандын Жумушчулар партиясы — ред.) аскердик жана каржылык колдоо көрсөтүп жаткан АКШ Түркияга жалаа жабуудан мурун ушул чындыкты көрүп койсун. АКШ бийлиги чыгарган чечимдерине негиз боло турган маалыматтарды кайдан алары жана объективдүүлүгү шек жаратат. Мындай жалаага тиешелүү жооп болот", — деп жазды Түркиянын ТИМи.
Ошондой эле ведомство БУУнун Сириядагы кырдаалды иликтөө боюнча комиссиясынын 12-сентябрга карата докладында РПК/YPG террордук уюмунун көптөгөн олуттуу кылмыштары катталганын эске салды. Анда балдарды азгыруу, аларды уурдоо, эркинен ажыратуу жана мектептерди аскердик максатта колдонуу аныкталган.