Медицинанын онкология багыты боюнча илимий изилдөөгө көңүл бурулушу керек. Тилекке каршы, жетиштүү каражат каралбагандыктан аталган тармакта кемчиликтер бар. Бул тууралуу Кыял Макиева Sputnik Кыргызстан радиосунун эфиринде маек куруп жатып билдирди.
Анын айтымында, медицина тыным албай өнүгүп жаткан учурда жаңы технологиялардан артта калбай кыргызстандык маммологдор дайыма эл аралык тажрыйбаны колдонуп, квалификациясын жогорулатып турушат.
"Медицинанын онкология багыты боюнча илим изилдөөгө көңүл бурулушу керек. Тилекке каршы, каражаттын жетишсиздигинен бул жаатта бир аз аксап жатабыз. Онкологиялык оорууга чалдыккандардын саны болсо жыл санап өсүүдө. Андыктан илдет пайда болгондон кийин дарылоого эмес, анын алдын алууга, пайда болгон шишикти эффективдүү дарылоо ыкмаларын иштеп чыгууга салым кошо турган илимге өзгөчө маани бериш керек. Ошондо учурда кыргызстандык медиктердин өз алдынча аракеттенип, квалификациясын жогорулатып, эл аралык тажрыйбаларды колдонуу менен иш алып барууга жасаган аракеттери азыркыдан да үзүрлүү болмок", — деди Макиева.
Ошондой эле адис элеттеги аялдарга караганда шаарда жашаган кыз-келиндер эмчек безинин рагына көп кабыларын кошумчалады.