БИШКЕК, 13-фев. — Sputnik. Өлкө башчы Садыр Жапаровдун Венгриянын президенти Каталин Новак менен расмий жолугушуу аземи болуп өттү. Бул тууралуу президенттин маалымат кызматы билдирди.
Атчан гусарлардын коштоосунда мамлекет башчынын кортежи Лайош Кошут аянтына келип, ал жактан Венгриянын президенти Каталин Новак тосуп алды.
"Ардак кароолдун саламдашуусунан кийин аскердик оркестрдин аткаруусундагы "Ракоци маршынын" жаңыруусу менен президенттер Будапешт шаарынын гарнизонунун туусунун жанына токтошту. Оркестр эки өлкөнүн мамлекеттик гимндерин аткарды. Садыр Жапаров жана Каталин Новак Венгриянын туусу менен гербине таазим этип, өздөрүнүн расмий делегация мүчөлөрүн тааныштырып өттү", — деп айтылат маалыматта.
Азем гарнизондун өздүк курамынын, атчан гусарлардын, аскердик оркестрдин салтанаттуу маршы менен аяктаганы кошумчаланды.