БИШКЕК, 28-янв. — Sputnik. Бишкекте 30-январдан 3-февралга чейин 25-60 жаштагы аялдардын жатын моюнчасынын жана эмчек рагын аныктоо жумалыгы өтөт. Бул тууралуу Саламаттык сактоо министрлигинен билдирди.
Иш-чара Рак менен күрөшүүнүн дүйнөлүк күнүнө карата уюштурулууда.
Маалыматка ылайык, илдетти аныктоо жумалыгы борбор калаадагы № 1, 2, 3, 4, 5, 6, 7, 9 үй-бүлөлүк дарыгерлер борборлорунда жана Бишкек шаардык студенттик бейтапканасында өтөт.
"Бул күндөрү бардык каалоочулар эмчек, жатын моюнчасын дарыгерлерге текшертип, кольпоскопиядан бекер өтө алат. Иш-чаранын негизги максаты — жатын моюнчасынын жана эмчек рагын алдын алууга коомчулуктун көңүлүн буруу", — деп билдирди министрлик.
Кыргызстанда жыл сайын онкологиялык оорулардын 5,5 миңге жакын жаңы учуру катталат. Бул илдеттен каза болгондордун саны боюнча Кыргызстан Борбор Азия өлкөлөрүнүн ичинен биринчи орунда турат.