БИШКЕК, 12-дек. — Sputnik. Евробиримдик өлкөлөрү Россияга каршы санкциялардын тогузунчу пакети боюнча азырынча бир пикирге келе элек. Бул тууралуу ЕБдин тышкы саясат боюнча жогорку өкүлү Жозеп Боррель Евробиримдиктин тышкы иштер министрлеринин жыйынынын алдында билдиргенин РИА Новости жазды.
"Бул ТИМдин эң оор жана узакка созулган жыйыны болот. Анткени күн тартибинде Иран менен Россияга каршы санкциялардын тогузунчу пакети турат. Биз ал боюнча бир чечимге келе элекпиз, ал иш бүтө элек. Биз сунуш киргиздик, эми министрлер аны бекитиши керек", — деди Боррель.
Дипломат Россияга каршы жаңы чаралар дүйшөмбү же шейшемби күнү макулдашыларына үмүттөнүп жатканын, бирок уюмга мүчө өлкөлөрдүн арасындагы ар кандай пикирлерден улам бул оңой болбой тургандыгын кошумчалаган.
Еврокомиссия өткөн шаршемби күнү Россияга каршы жаңы санкциялар пакети боюнча сунуштарды берген. Анда энергетика тармагына каршы кошумча чаралар, анын ичинде тоо-кен тармагына инвестиция салууга, дрондорду экспорттоого тыюу салуу, ошондой эле экспорттук чектөөлөрдү кеңейтүү каралган. 200гө жакын адамдарга жана уюмдарга санкция киргизүү пландалууда. Кеп аскердик, аскердик-өнөр жай комплексинин ишканалары, Мамлекеттик думанын жана Федерация кеңешинин депутаттары, министрлер, саясий партиялар, аймак жетекчилери жөнүндө болуп жатат. Төрт телеканал жана үч банк, анын ичинде Бүткүл россиялык аймактык өнүктүрүү банкы чектөөгө кабылат.
Украинадагы абалга байланыштуу Москвага каршы санкциялардын бир нече пакети кабыл алынган. Президент Владимир Путин Россияны ооздуктап, алсыратуу Батыштын узак мөөнөттүү стратегиясы экенин айтып келет. Ал белгилегендей, АКШ менен Европанын негизги максаты — миллиондогон адамдардын жашоо-шартын начарлатуу.