БИШКЕК, 4-ноя. — Sputnik. Жогорку Кеңеш "Кыргызстанда балдардын ден соолугуна, дене бой, интеллектуалдык, психикалык, руханий жана адеп жактан өнүгүүсүнө зыян келтирүүнүн алдын алуу боюнча чаралар жөнүндө" мыйзам долбоорун коомдук талкууга койду.
Парламенттин сайтына жарыяланган документти депутат Аида Исатбек кызы демилгелеген.
Мыйзам долбоорунда түнкүсүн жалгыз, жанында чоң кишилер жок басып жүргөн балдардын ата-энелерине чара көрүү максатында ата-энелик укуктан ажыратуу же чектөө сунушталган.
"Жайында (1-июндан 31-августка чейин) саат 23:00дөн таңкы 06:00гө чейин, жылдын калган мезгилинде саат 22:00дөн 06:00гө чейинки убакытта тыюу салынган жерлерде же коомдук жайлардан жашы жете элек балдар кайрадан табылган учурда балдарды коргоо боюнча ыйгарым укуктуу орган ата-энелик укуктардан ажыратуу же чектөө, камкорчуларды, баланы баккан адамды милдеттерин аткаруудан четтетүү жөнүндө маселени демилгелөөгө укуктуу", — деп жазылат документте.
Маалым болгондой, бул мыйзам долбоору ата-энелердин өз милдеттерин аткаруудагы жоопкерчилигин жогорулатуу, жашы жете электерге талаптагыдай көзөмөлдү камсыз кылуу максатында киргизилүүдө.