БИШКЕК, 16-окт. — Sputnik. Жалал-Абад облусуна караштуу Сузак районунун Кара-Дарыя айылында былтыркы селден жабыркаган сегиз үй-бүлө жаңы турак жайлуу болду. Бул тууралуу облустук администрациядан билдиришти.
Ага ылайык, үйлөрдүн ачкычын тапшыруу аземине президенттин Жалал-Абад облусундагы өкүлү Абсаттар Сыргабаев, Жогорку Кеңештин депутаты Жеңиш Токторбаев, Сузак районунун акими Баратбек Сыдыкназаров жана жергиликтүү тургундар катышкан.
Эске салсак, былтыр июнь айында Сузактын Чаңгыр-Таш айылында катуу жааган жамгырдын кесепетинен дамба жырылып, айылдагы турак үйлөр, оорукана, мектеп, ошондой эле бала бакча суу астында калган.
Маалым болгондой, былтыркы жылдан бери Кара-Дарыя айыл аймагынын Чаңгыр-Таш айылынын бир нече тургуну вагондо жашап келген. Үй салууга чамасы жетпеген жашоочуларга жер тилкеси бөлүнүп, үч бөлмөлүү турак жайга мамлекет тарабынан 5 миллион 600 миң сом акча чегерилген. Мындан сырткары, облустагы мекеме-ишкана кызматкерлеринин бир күндүк эмгек акысы которулган. Жалпысынан сегиз үйдү курууга 12 миллион сом жумшалганы кошумчаланды.