Касымалы Баялинов 1902-жылы 25-сентябрда Ысык-Көл районунун Көк-Мойнок айылында жарык дүйнөгө келген. Эрте эле ата-энесинен ажырап туугандарынын колунда чоңойгон. 1916-жылкы Үркүндө 14 жашар Касымалы эл менен кошулуп Кытайга качып Октябрь революциясынан кийин мекенге кайтып келип Кочкордо малай болуп жүрүп, 16 жашында Токмокко жөө келген. Ошентип эптеп жан багып аскердик бөлүмдө ашпозчунун жардамчысы, дарыканада дары-дармек ташуучу болуп эмгектенген.
17 жашында комсомолдун катарына кошулуп Ташкенттеги алты айлык советтик-партиялык курста окуган. Билимге суусаган жигит андан соң алты айлык педагогикалык курсту, Алматыдагы казак педагогикалык техникумун, Москвада Бүткүл союздук журналистика институтун аяктаган.
Болочоктогу калемгер алгачкы ырларын 18 жашында жазып, казак, татар тилинде чыккан. 1926-жылы "Ажар" аттуу аңгемеси биринчи жолу жарык көрөт. Кийин "Бакыт", "Кыйын өткөөл", "Курман жылга" повесттерин, "Боордоштор", "Көл боюнда" романдарын, "Түлкү менен суу", "Чабалекей менен жылан", "Шаифтин аңгемеси", "Мурат" аттуу аңгемелерин жаратып, котормочулук менен да алектенген. Кыргыз эл жазуучусу 1979-жылы 3-октябрда 77 жашында дүйнө салган.
Тема боюнча: