БИШКЕК, 12-авг. — Sputnik. Социалдык маселелерди тескеген вице-мэр Виктория Мозгачева Бишкек шаарында мугалимдердин маянасы канчага көбөйгөнү тууралуу айтып берди.
Ал бүгүн Sputnik Кыргызстандын мультимедиалык маалымат борборунда өткөн "Бишкектеги мектеп жана бала бакчаларда жаңы окуу жылы кандай өтөт" аттуу брифингге катышкан.
"Эгер мурда мугалимдердин орточо айлык акысы 15 миң сом болсо, жогорулагандан кийин 27 миң сомго жетти. Ошол эле учурда көп жылдык педагогикалык тажрыйбасы, билим берүүдөгү жетишкендиктери, жогорку категориясы барларды эске алуу керек. Алар 45 миң сомго чейин алууда", — деди вице-мэр.
Мозгачеванын айтымында, маяна көтөрүлгөндөн кийин педагогикалык жамаатты кадр менен камсыздоо көйгөйү жеңилдеген. Мугалим болуп иштөөгө кызыккандар арбып, жадагалса курулуп бүтө элек мектептерге кирүүгө резюме жөнөтүп жатышат.