БИШКЕК, 3-май — Sputnik. Садыр Жапаров бүгүн, 3-майда, Венгриянын тышкы экономикалык байланыштар жана тышкы иштер министри Петер Сийяртону кабыл алды. Бул тууралуу өлкө башчынын маалымат кызматы билдирди.
Жолугушуунун жүрүшүндө саясий, соода-экономикалык жана маданий-гуманитардык чөйрөлөрдө эки тараптуу кызматташуунун актуалдуу маселелери боюнча пикир алмашуу болду.
"Венгрия-Кыргыз өнүктүрүү фонду аркылуу биргелешкен инвестициялык долбоорлорду ишке ашырууга өзгөчө көңүл бурулду. Президент белгилегендей, эки тарап саясий диалогду активдүү колдоп, өз ара пайдалуу кызматташтыкты өнүктүрөт. Кыргыз тарап быйыл Венгриянын премьер-министри Виктор Орбандын келишин күтүп жатканын ырастады", — деп жазылат билдирүүдө.
Ошондой эле мамлекет башчы Петер Сийяртону "Достук" ордени менен сыйлап, анын кыргыз-венгер мамилелерин, стратегиялык өнөктөштүгүн жана достугун чыңдоого кошкон жеке салымын белгилеген.
"Биз буга Украинадан жүздөн ашуун жарандарыбызды эвакуациялоо учурунда дагы бир жолу ынандык", — деген Жапаров.
Өз кезегинде Сийярто жылуу кабыл алууга жана "Достук" ордени үчүн ыраазычылык айтып, мындан ары да эки өлкөнүн ортосундагы кызматташтыкты тереңдетүү боюнча аракетин уланта турганын билдирген.