Буга чейин Sputnik Кыргызстан агенттиги парламентке партия тизмеси менен келген депутаттардын билими тууралуу жазган. Эми мыйзам чыгаруу палатасына округдардан шайланып келген эл өкүлдөрүнүн билими тууралуу кеп болот.
Бишкек шаары
Ленин шайлоо округунан депутат болгон Жаныбек Абиров Кыргыз-Россия Славян университети менен КР президентинин алдындагы башкаруу академиясын аяктап, "юриспруденция", ошондой эле "мамлекеттик жана жергиликтүү башкаруу менеджменти" адистигин алган.
Октябрь шайлоо округунан депутат болгон Дастан Бекешев 2006-жылы Кыргыз-Россия Славян университетинин юридика факультетин бүтүргөн.
Баткен облусу
Лейлек шайлоо округунан депутат болгон Чыңгыз Ажибаев кесиби боюнча юрист. Белгилей кетсек, ал Жогорку Кеңештеги жаш депутаттардын катарын толуктайт. Эл өкүлү 30 жашта.
Баткен шайлоо округунан шайланган Нурлан Ражабалиев Скрябин атындагы Кыргыз айыл чарба институтунда окуган, Ош мамлекеттик университетинен "юриспруденция" адистигин алган.
Кадамжай округунан депутат болгон Ырысбек Атажанов Кыргыз мамлекеттик транспорт жана архитектура университетинин жол кыймылын уюштуруу факультетинде билим алган.
Ош шаары, Ош облусу
Көк-Жар шайлоо округунан депутат болгон Өмүрбек Бакиров 2001-жылы Кыргыз-Өзбек университетинин финансы жана кредит факультетин бүтүргөн.
Ноокат шайлоо округунан шайланган Жусупбек Коргонбай уулу кесиби боюнча юрист. Ош мамлекеттик университетинде билим алган.
Ош шайлоо округунан депутат болгон Айбек Осмонов Ош мамлекеттик университетинин "информациялык системалар жана технологиялар" адистигине окуган. Ошондой эле ТИМдин Казы Дикамбаев атындагы Дипломатиялык академиясын аяктаган.
Төлөйкөн шайлоо округунан депутат болгон Нурбек Алимбеков бир эмес төрт кесиптин ээси. 1997-жылы Ош технологиялык университетинде "инженер-технолог" адистигине окуса, 2000-жылы ушул эле окуу жайдын юриспруденция факультетин аяктаган. Андан соң Кыргыз улуттук университетинин экономикалык факультетин, 2012-жылы КР президентинин алдындагы башкаруу академиясынын мамлекеттик башкаруу факультетин бүтүргөн.
Кара-Суу шайлоо округунан депутат Искендер Матраимов кесиби боюнча зооинженер. Кийин Кыргыз улуттук университетинде юриспруденция багыты боюнча экинчи жогорку билимин алган.
Куршаб шайлоо округу боюнча депутат Данияр Төлөнов Ош технологиялык университетин "автомобиль жана автомобилдик чарба" адистигин аяктаган. 2008-2010-жылдары КР президентинин алдындагы башкаруу академиясынан менеджмент багыты боюнча магистратураны аяктаган.
Алай шайлоо округу боюнча депутат болгон Улан Примовдун биринчи кесиби экономист. Кийин Ош мамлекеттик университетинин "юриспруденция" адистиги боюнча билим алган.
Өзгөн шайлоо округунан келген Элмурза Сатыбалдиев Ж.Баласагын атындагы Кыргыз улуттук университетинин юридика факультетин аяктаган.
Араван шайлоо округу боюнча депутат болгон Жалолидин Нурбаев К.И. Скрябин атындагы Кыргыз айыл чарба институтун агрономия багыты боюнча бүтүргөн.
Жалал-Абад облусу
Сузак шайлоо округунан депутат болгон Тазабек Икрамов билими боюнча дене тарбия мугалими. Кийин Кыргыз мамлекеттик юридикалык академиясында билимин жогорулаткан.
Жалал-Абад шайлоо округунан депутат болгон Шаирбек Ташиев Жалал-Абад коммерциялык институтунун "коммерциялык ишмердүүлүк" адистиги боюнча бүтүргөн. Кийин КР президентинин алдындагы башкаруу академиясын аяктап, магистр даражасына ээ болгон. Москва бажы академиясында да билим алган.
Базар-Коргон шайлоо округунан депутат болгон Айбек Алтынбеков Ош мамлекеттик университетинин юридика факультетин аяктаган.
Ноокен шайлоо округунан тандалып келген Бактыбек Сыдыков Москвадагы мамлекеттик техникалык университетинин инженер-механик факультетин аяктаган. Ошондой эле КР президентинин алдындагы башкаруу академиясында "мамлекетти башкаруу менеджменти" адистигине окуган.
Аксы шайлоо округунан депутат Нурлан Шакиев Кыргыз агрардык академиясынын экономика жана агробизнес факультетинде окуп, менеджмент адистигин алган.
Ала-Бука шайлоо округунан депутат болгон Азизбек Турсунбаев кесиби боюнча стоматолог. Ал Кыргыз медициналык институтунун стоматологиялык факультетинде окуп, кийин Кыргыз улуттук университетинин юридика факультетин бүтүргөн. Андан соң кайра Ош облустук стоматологиялык бейтапканасында интернатурада окуган.
Токтогул шайлоо округунан депутат болгон Кундузбек Сулайманов Фрунзе шаарындагы СПТУда, ошондой эле Кыргыз мамлекеттик политехникалык институтунда окуп, инженер-механик кесибине ээ болгон. Мындан тышкары, Кыргыз-Россия Славян университетин "юриспруденция" адистиги боюнча бүтүргөн.
Талас облусу
Манас шайлоо округунан депутат болгон Дастанбек Жумабековдун юридикалык билими бар.
Талас шайлоо округунан депутат болуп шайланган Бактыбек Чойбеков Автожол колледжин, Кыргыз мамлекеттик курулуш, транспорт жана архитектура университетин аяктап, "автожолдорду жана аэродром куруудагы инженер-куруучу" адистиги боюнча бүтүргөн. Ошондой эле Бишкек гуманитардык университетин "дүйнөлүк экономика" адистиги боюнча аяктаган.
Чүй облусу
Жайыл шайлоо округунан депутат болгон Нурланбек Азыгалиевдин да бир нече билими бар. Алгач Фрунзе атындагы совхоз-техникумун "зоотехник" адистиги боюнча бүтүрсө, кийин К.И. Скрябин атындагы Кыргыз айыл чарба институтун, Эгей университетин "зооинженер" адистиги боюнча аяктаган (Түркия, Измир). Мындан тышкары, юридикалык билими бар.
Москва шайлоо округунан депутат Карим Ханджеза Кыргыз-Россия Славян университетинин саясат таануу факультетинде окуп, магистр даражасына ээ болгон. Ушул эле окуу жайды "эл аралык укук" адистиги боюнча аяктаган.
Зоотехниктердин катарында Сокулук шайлоо округунан депутат болгон Аманкан Кенжебаев да бар. Ал Фрунзе совхоз техникумун бүтүрүп, кийин Жусуп Баласагын атындагы Кыргыз улуттук университетин аяктап, экономист кесибине ээ болгон.
Аламүдүн шайлоо округунан депутат болгон Сеидбек Атамбаев Кыргыз мамлекеттик курулуш, транспорт жана архитектура университетинин "инженер-куруучу" адистигин аяктаган. Мындан тышкары, ал кесиби боюнча менеджер. 2008-жылы Германиядагы Invent аталышындагы кичи жана ири бизнести өнүктүрүү программасын окуп, стажировкадан өткөн.
Ысык-Ата шайлоо округунан депутат болгон Акбөкөн Таштанбеков Ишеналы Арабаев атындагы Кыргыз мамлекеттик университетин "юриспруденция" адистиги боюнча аяктаган.
Чүй-Кемин шайлоо округунан депутат болгон Медербек Саккараев К.И. Скрябин атындагы Кыргыз айыл чарба институтунда агрономия факультетин бүтүргөн. Кийин Жусуп Баласагын атындагы Кыргыз улуттук университетинде "юриспруденция" адистигин окуган.
Нарын облусу
Кочкор шайлоо округунан депутат Мирлан Самыйкожо Бишкек гуманитардык университетин аяктаган. Кесиби боюнча журналист.
Нарын шайлоо округунан депутат болгон Улан Бакасов инженер-энергетик. Бул кесипке ал Жалал-Абад мамлекеттик университетинен ээ болгон. Мындан тышкары, Кыргыз мамлекеттик юридикалык академиясынан "юриспруденция" багыты боюнча магистратураны бүткөн.
Ысык-Көл облусу
Жети-Өгүз шайлоо округунан эл өкүлү болгон Арсланбек Малиев Украинадагы Тышкы экономикалык байланыштар жана маалымат илимий изилдөө институтун аяктаган.
Ак-Суу шайлоо округунан депутат болгон Акылбек Түмөнбаев биринчи жогорку билимди Жусуп Баласагын атындагы Кыргыз улуттук университетинде алып, юрист болгон. Андан соң Казы Дикамбаев атындагы Дипломатиялык академияны бүтүргөн.
Ысык-Көл шайлоо округу боюнча депутат Максатбек Сарыбагышев 2010-жылы Жусуп Баласагын атындагы Кыргыз улуттук университетинде окуп, "менеджмент" адистигин алган.
Эске салсак, 28-ноябрдагы парламенттик шайлоодо Бишкек шаарынын Свердлов жана Биринчи май шайлоо округдарында "баарына каршы" графасы талапкерлердин алган добушунан ашып кеткендиктен шайлоо өтпөй калды деп таанылган. Кайра шайлоо 27-февралда болот.
Жогорку Кеңештин VII чакырылышында 90 депутат болот.