БИШКЕК, 4-янв. — Sputnik. Президенттин маалымат кызматы Тимур Файзиевдин Ысык-Көлгө "Асман экологиялык таза шаарын" куруу боюнча мамлекеттик дирекциянын башкы директору болуп дайындалганын тастыктады.
Тийиштүү буйрукка министрлер кабинетинин төрагасы Акылбек Жапаров кол койгону айтылды.
Буга чейин Elite House курулуш фирмасынын негиздөөчүсү Тимур Файзиев социалдык баракчасы аркылуу дирекциянын жетекчилигине дайындалганын билдирген.
Белгилей кетсек, өткөн жылдын 28-май күнү Аскер прокуратурасы Файзиевге издөө жарыялаган. Ал Бишкектин аймагынан жер алууда коррупциялык иштерге аралашкан деп шектелген. Мындан тышкары, курулуш иштерин мыйзамсыз жүргүзгөн деген да кине коюлган.
Биринчи май райондук соту Файзиевдин сыртынан бөгөт чарасын карап, аны №1 тергөө абагына киргизүү чечимин чыгарган, бирок кийин бөгөт чарасы өзгөртүлгөн. Анын жүргөн жери белгисиз болчу.
Кийинчерээк Файзиевдин иши УКМКга өткөнү кабарланган. Бизнесменге карата ачылган иш тергелип жаткан-жатпаганы белгисиз.
"Асман" шаарын куруу
2021-жылдын июль айында президенттин администрациясы Ысык-Көл облусуна караштуу Тору-Айгыр айылына жакын жерде 500 миң адамга ылайык инновациялык "Асман" шаарын куруу пландалып жатканын кабарлаган. Бийлик "Асман" Кыргызстандын экономикалык жана туристтик борбору болорун айткан. Болочок шаардын долбоордук чечимдерин иштеп чыгуу үчүн ведомстволор аралык топ түзүлгөн.