Ак жолтой болушту! Кыргыз спортчуларынын жыл ичиндеги ийгилиги

Кыргызстандык спортчу Манас Абдаким уулу (68 кг) профессионалдык күжүрмөн самбо боюнча дүйнө кубогунда чемпион болду. Турнир 9-январда Россиянын Санкт-Петербург шаарында өттү.

Балбан кыз Айсулуу Тыныбекова (62 кг) Киев шаарында өткөн эл аралык турнирдин финалында жергиликтүү Илона Прокопевнюкту 9:7 эсеби менен утуп чемпион болду. Ал эми грек-рим күрөшүнүн балбаны Жоламан Шаршенбеков (60 кг) күмүш медаль тагынды.

Казакстандын "Кайрат" клубунун кыргызстандык жарым коргоочусу Гүлжигит Алыкулов Азия футбол конфедерациясынын сурамжылоосу боюнча, башка өлкөнүн командаларында ойногон Азия футболчуларынын арасында эки жума удаасы менен "Аптанын оюнчусу" болду.

Аралаш мушташты аркалаган кыргызстандык мушкер Зулкарнайн Камчыбеков АКШдагы Fighting Fury Championship (CFFC) турниринде (жеңил салмак) чемпион болду. 2-апрелде Филадельфияда өткөн мелдеште ал америкалык Жесси Смитти экинчи раундда техникалык нокаут менен уткан. Камчыбеков ушуну менен бешинчи жеңишин камсыздап, алтын курдун ээси болду.

Кыргызстанда алгачкы ирет дзюдо боюнча Азия жана Океания чемпионаты өттү. Анда кыргызстандык дзюдочу Владимир Золоев (81 кг) чемпион болду. Бул — өлкөнүн дзюдо тарыхында Азия жана Океания чемпионатынан алгачкы алтын байге.

Мелдеште дагы бир ата мекендик спортчу Кубанычбек Айбек уулу (60 кг) коло байге жеңди.

Өлкөнүн грек-рим күрөшүнүн балбандары Жоламан Шаршенбеков (60 кг), Үзүр Жусупбеков (97 кг) жана Акжол Махмудов (77 кг) Токио Олимпиадасына жолдомо алышты. Кыз-келиндер күрөшүнөн Айпери Медет кызы (76 кг), Мээрим Жуманазарова (68 кг) олимпиадалык лицензияга ээ болду. Өлкөнүн эркин күрөш балбандарынан биринчи болуп Эрназар Акматалиев Олимпиадага жолдомо алды. Ал 65 килограммдык салмакта ат салышып, мелдештин чемпиону болгон.

Балбандар Казакстандын Алматы шаарында өткөн Олимпиадага жолдомо берилүүчү квалификациялык турнирде ийгилик жаратышкан.

Кыргызстандык балбан кыздар Айсулуу Тыныбекова (62 кг) менен Мээрим Жуманазарова (68 кг) Казакстандын Алматы шаарында өткөн Азия чемпионатында алтын медаль жеңди.

Ушул эле мелдеште Айпери Медет кызы (76 кг) күмүш медаль тагынды.

Кыргызстандык мушкер Жантөрө Ташиев (64 кг) бокс боюнча жаштар арасындагы дүйнө чемпионатында коло байге тагынды.

UFC уюмунун кыргызстандык мушкери Валентина Шевченко кезектеги атаандашы Жессика Андрадени жеңип, бешинчи ирет чемпиондук наамын коргоду.

Кыргызстандык фехтование чебери Роман Петров Токио Олимпиадасына лицензия жеңип алды. Спортчу 25-апрелде Өзбекстандын Ташкент шаарында өткөн Азия жана Тынч Океания квалификациялык мелдешинде биринчи орунду ээлеп, алтын байге тагынган.

Ысык-Көлдө алгачкы ирет Олимпиадага жолдомо ойнотулган Шанхай кызматташтык уюмунун Run the Silk Road эл аралык марафону өттү. Ага 35 өлкөдөн 3 000 жеңил атлет жана спорт ышкыбоздору катышып, 42 чакырымга чуркашты. Бирок бир да спортчу Олимпиада оюндарына лицензия ута алган жок.

Ядро ыргытуу спортунун чебери Арстанбек Базаркулов Токиодо өтө турган XVI Паралимпиада оюндарына лицензия алды. Спортчу 7-18-майда Швейцариянын Ноттвиль шаарында өткөн Гран-при мелдешинде спорттук снарядды 7,98 метр алыстыкка ыргытып, коло медаль тагынган.

Балбан кыз Айсулуу Тыныбекова (62 кг) Польшадагы Poland Open рейтингдик турниринде алтын тагынды. Натыйжада Тыныбекова UWW рейтингинин сап башына чыкты.

Июнь айында оор атлетчи Бакдөөлөт Расулбеков, ок атуу спортунун чебери Каныкей Кубанычбекова жана дзюдочу Владимир Золоев Токио Олимпиадасына лицензия жеңип алышты.

Июль айында эркин күрөш балбаны Айаал Лазарев (125 кг), жөө күлүк Нурсултан Кеңешбеков Олимпиада оюндарына жолдомо алышты.

Кыргызстандын тарыхында биринчи жолу көзү азиз дзюдочу Хайитхон Хусан кызы Токиодо өтө турчу Паралимпиада оюндарына лицензия утуп алды.

Токиодо Олимпиада оюндары расмий ачылып, Кыргызстандын улуттук командасы салтанаттуу параддан 56-катарда өттү. Мерген кыз Каныкей Кубанычбекова менен суучул Денис Петрашов мамлекеттик тууну көтөрүп чыгышты.

Кыргызстандын грек-рим күрөшү боюнча балбаны Акжол Махмудов Токио Олимпиадасынын финалдык беттешинде упай айырмасы менен венгриялык Тамаш Лёринцке жеңилип, күмүш медалга татыды.

Мээрим Жуманазарова монголиялык Соронзонболдын Батцэцэгди жеңип, Олимпиаданын коло байгесин утту. Спортчу кыздардын ичинен биринчи болуп Олимпиада медалын тагынды.

UFC уюмунун экс-мушкери Хабиб Нурмагомедовдун Eagle Fighting Championship (EFC) лигасынын турниринде кыргызстандык Бусурманкул Абдибаит уулу (65 кг) россиялык Руслан Яманбаевди техникалык нокаут менен утуп, чемпиондук курун тагынды. Мелдеш Ысык-Көлдө өттү.

Айсулуу Тыныбекова Токио Олимпиадасынан күмүш байге утту. Финалдык беттеште ал упай айырмасында япониялык Юкако Каваиге жеңилди. Бул Кыргызстандын Токио Олимпиадасындагы экинчи күмүш медалы болду.

Кыргызстандык ММА мушкери Алимардан Абдыкааров OPEN FC лигасынын алгачкы Гран-при мелдешинде чемпион болду. Финалда армениялык Айк Казарянды нокаут кетирип уткан кыргызстандык атлет чемпиондук курду тагынып, бир миллион рубль акчалай сыйлык алды. Турнир 14-августта Бишкектеги Дөлөн Өмүрзаков атындагы стадиондо өттү.

Токиодо XVI Паралимпиада оюндарынын ачылыш аземиндеги салтанаттуу параддан өтүштү. Ага Кыргызстандын курама командасы дагы катышып, өлкө атынан ядро ыргытуу спортунан Арстанбек Базаркулов жана дзюдодон Хайитхон Хусан кызы (57 кг) барышкан.

Бишкекте "Үч улуттун кубогу" мелдеши өтүп, ага Кыргызстан, Палестина жана Бангладеш курама командалары катышты. Улуттук команда 2-сентябрда Палестина футболчуларын 1:0, ал эми 7-сентябрда Бангладешти 4:1 эсебинде утуп, "Үч улуттун кубогу" жолдоштук мелдешинин жеңүүчүсү болду.

Дөлөн Өмүрзаков атындагы стадиондо өткөн Кыргызстан — Бангладеш беттешине президент баш болгон өлкө жетекчилери да келишти. Бул турнир улуттук курама команданын Азия кубогу-2023 чемпионатынын тандап алуу оюндарына карата даярдыктын алкагында өттү.

Балбан кыз Калмира Билимбек кызы (55 кг) Россиянын Казань шаарында өткөн КМШ мамлекеттеринин оюндары эл аралык мелдешинде алтын медаль утса, каратэ боюнча улуттук курама команданын мүчөсү Калыс Нурланбек уулу (67 кг) алтын медаль тагынды. КМШ оюндары быйыл алгачкы ирет уюштурулуп, өткөрүлдү.

UFC уюмунун жеңил салмактагы кыргызстандык чемпиону Валентина Шевченко америкалык Лорен Мерфини утуп, алтынчы ирет чемпиондук наамын коргоп калды.

Кыргызстандык Нурбек Тойчубаев паратриатлон боюнча дүйнө кубогунда биринчи келип, алтын медаль тагынды. Спорттук иш-чара Түркиянын Аланья шаарында болгон.

Кыргызстандык арбитр Нурдин Букуев футзал боюнча дүйнө чемпионатынын финалдык беттешин башкы калыс катары тейлеп, FIFA президенти Жанни Инфантинонун колунан сыйлык алды. Букуев төрт дүйнө чемпионатын, анын ичинде финалдык оюнду тейлеген алгачкы калыс болду.

Эркин күрөш балбаны Алибек Осмонов (65 кг) Норвегиянын Осло шаарында өткөн дүйнө чемпионатында коло байгелүү болду. Дагы бир эркин күрөш балбаны Эрназар Акматалиев (70 кг) финалында польшалык Магомедмурат Гаджиевге 2:1 эсебинде жеңилип, күмүш байгеге татыды. Эрназар эгемен Кыргызстандын эркин күрөш боюнча дүйнө чемпионатынан күмүш байге уткан алгачкы балбан болуп калды.

Ушул эле турнирде Айсулуу Тыныбекова кыз-келиндер күрөшү боюнча дүйнө чемпиону болду. Ал финалда америкалык спортчу Кайла Коллин Кийоко Миракл менен күрөшүп, 7:0 эсеби менен жеңишке жетти.

Бул мелдеште Айпери Медет кызы (76 кг) коло байгеге ээ болду.

Эртеси Мээрим Жуманазарова (68 кг) дүйнө биринчилигинин финалында япониялык Рин Мьядзини далысын тийгизип утуп, чемпион болду.

Жоламан Шаршенбеков грек-рим күрөшү боюнча дүйнө чемпионатынан күмүш медаль утту.

Тарыхта биринчи ирет Кыргызстандын командасы Ослодогу дүйнө чемпионатына катышкан 27 өлкөнүн ичинен медалдар жарышынан ири күрөш державалардын катарында 5-орунду ээледи.

Англияда жашаган кыргызстандык Мирлан Кенжебаев (86 кг) эркин күрөш боюнча Британиянын ички биринчилигинде чемпион болду. Мелдеш 23-октябрда Улуу Британиянын Манчестер шаарында өткөн. Кенжебаев Ысык-Көл облусунун тургуну, Республикалык олимпиадалык резервдер окуу жайын бүтүргөн.

Балбан Айпери Медет кызы (76 кг) спорттук күрөштүн түрлөрү боюнча Сербияда өткөн 23 жашка чейинкилер (U23) арасындагы дүйнө биринчилигинин финалында колумбиялык Татьяна Рентиераны 3:1 эсеби менен утуп чемпион болду.

Ушул эле мелдеште эркин күрөш балбаны Бекболот Мырзаназар уулу күмүш медаль тагынып, сүйүнттү.

Ал эми Эрназар Акматалиев (70 кг) чемпион болду. Ал финалда армениялык Вазген Теванянды менен кез келген.

Өлкөнүн лыжа спортунун чебери Максим Гордеев XXIV кышкы Олимпиада оюндарына лицензия алды. Эскерте кетсек, кышкы Олимпиада оюндары 2022-жылы 4-февралдан 20-февралга чейин Кытайдын Пекин шаарында өтөт.

Темир билек балбан Бекдөөлөт Расулбеков (102 кг) оор атлетика боюнча Ташкент шаарында өткөн дүйнө чемпионатында түртүп көтөрүүдө 217 килограммды багындырып, күмүш медаль тагынды. Бекдөөлөттүн бул көрсөткүчү эгемен Кыргызстандын тарыхында дүйнө биринчилигиндеги эң жогорку жетишкендик.

Бириккен күрөш дүйнөсү уюму Кыргызстандын кыз-келиндер күрөшү боюнча курама командасын 2021-жылдын жыйынтыгы менен эң ийгиликтүү беш команданын бири деп тапты. Спорттук уюм КРдин балбан кыздары дүйнөлүк спорттук аренада ири ийгилик жаратканын белгилеген. Норвегиядагы дүйнө чемпионатында Айсулуу Тыныбекова менен Мээрим Жуманазарова алтын, Айпери Медет кызы коло медаль тагынган.

UWW Asia (Азия күрөш дүйнөсү) уюму Айсулуу Тыныбекованы "Азиянын эң мыкты балбан кызы" деп аныктады. Аталган уюм күрөштүн олимпиадалык (грек-рим, эркин жана кыз-келиндер) түрлөрү боюнча жыл ичинде зор ийгиликтерге жетишкен спортчуларды тандаган.

17-декабрда Бишкекте кыргыз футболунун 100 жылдыгына карата футзал боюнча достук мелдеши өтүп, президент Садыр Жапаров өзү да ойноду. Турнирде президенттин администрациясы, “Алга” ардагерлер, “Журналисттер”, “Спорттук федерациялар”, “Бизнес” жана “Өнөр” командалары катышты.