Бишкек шаарынын Свердлов жана Биринчи май шайлоо округдарында кайра шайлоо өтөт. Анткени бул жерде "баарына каршы" графасы добуштардын басымдуу бөлүгүнө ээ болгон. Бул тууралуу Узарбек Жылкыбаев Sputnik Кыргызстан радиосунда маек куруп жатып маалымдады.
Анын айтымында, кайра шайлоо өнөктүгүндө шайлоо кампаниясы 1/3ге кыскарат. Башкача айтканда, мыйзамга ылайык, даярдык иштерине 90 күн каралса, бул жерде 60 күн, үгүт иштерине 20 күн берилет.
"Мыйзам боюнча, шайлоодон кийин айрым тилкелерде шайлоонун эки түрү өтүшү мүмкүндүгү көрсөтүлгөн. Алар жокко чыгарылган жана кайра шайлоо деп аталат. Учурда бизде парламентке эки округда кайра шайлоо болгону турат. Бул борбор калаадагы Свердлов жана Биринчи май шайлоо округдары. Анткени "баарына каршы" эң көп добуш алган. Ал эми талапкер катары мыйзамда көрсөтүлгөндөй 25 жашка толгон, мурда соттолбогон, жогорку билимдүү кыргызстандык бардык жарандар катыша берет. Мурда катышып өтпөй калган талапкерлер боюнча эч кандай чек жок. Мейли алар партиялык тизме менен катышсын же бир мандаттуу тартипте чыккан болсун, кайрадан шайлоо өтсө талапкерлигин кое алышат",— деди Жылкыбаев.
Ал талапкер болуу үчүн жарандын катталган жери да эске алынбай тургандыгын, башкача айтканда, өлкөнүн каалаган шайлоо округунан өзүн көрсөтө берсе болорун кошумчалады.
Эске салсак, ушул жылдын 28-ноябрында өлкөдө Жогорку Кеңештин VII чакырылышына депутаттарды шайлоо болуп өткөн. Ал алгач ирет аралаш системада өткөн. Соңку маалыматтар боюнча, анда эки шайлоо округунда "баарына каршы" графасы добуштардын көбүн алган.