БИШКЕК, 6-окт. — Sputnik. Кыргызстандык балбан Айсулуу Тыныбекова кыз-келиндер күрөшү боюнча дүйнө чемпионатынан алтын медаль утту.
Ал финалда америкалык спортчу Кайла Коллин Кийоко Миракл менен кез келди. Биринчи бөлүктө атаандашы пассивдүү болгону үчүн бир упай алган. Экинчи таймда кыргызстандык балбан кыз дагы жанданып, улам-улам ыкма жасап жатты. Натыйжада 7:0 эсеби менен жеңип, атаандашына бир да мүмкүнчүлүк берген жок.
Аягында ал улук машыктыруучусу Байгазы Кенжебаев экөө Кыргызстандын желегин көтөрүп, килемди айланып чуркап өтүштү.
Айсулуу турнирдин 1/8 финалынан тарта күрөшүп, алгачкы беттешинде япониялык Ноноко Озакини 6:4 эсебинде, кийин беларустук Вераника Иванованын далысын жерге тийгизип уткан. Ал эми украиналык Илона Прокопевнюкту 5:2 упай айырмасында жеңип, финалга чыккан.
Айсулуу Тыныбекова ушуну менен экинчи ирет дүйнө чемпиондугун багындырды. Ал 2019-жылы Нур-Султанда өткөн дүйнө чемпионатынан да алтын медаль уткан. Токио Олимпиадасынын күмүш байгесинин ээси. Ошол эле учурда эгемен тарыхта эки алтын уткан алгачкы балбан болуп калды.
Спорттук күрөштүн (грек-рим, эркин жана кыздар күрөшү) түрлөрү боюнча дүйнө чемпионаты ушул күндөрү Норвегиянын Осло шаарында өтүп жатат. Турнир 2-октябрда эркин күрөш балбандарынын мелдеши менен башталган. 4-6-октябрда кыз-келиндер күрөшү менен уланып, 7-10-октябрда грек-рим күрөшүнүн балбандарынын таймашы менен жыйынтыкталат.