БИШКЕК, 31-авг. — Sputnik. Үстүбүздөгү жылдын октябрь айынан тарта мүмкүнчүлүгү чектелген балдарга берилчү жөлөк пулдун көлөмү көтөрүлөт. Бул тууралуу мамлекет башчы Садыр Жапаров "Ала-Тоо" аянтында кыргызстандыктарды эгемендүүлүктүн 30 жылдыгы менен куттуктап жатып билдирди.
Анын айтымында, 2009-жылдан бери ден соолугунан мүмкүнчүлүгү чектелген балдардын жөлөк пулу 4000 сомдон жогорулаган эмес.
"Жөлөк пул октябрдан баштап 6000 сомго, 2022-жылдан тартып 8000 сомго көтөрүлөт. Ал эми ата-энесинин экөөнөн тең айрылган балдардын социалдык жөлөк пулунун өлчөмүн 2022-жылдын 1-январынан тартып үч эсеге жогорулатуу каралып жатат. Кыскача айтканда, социалдык колдоого муктаж жарандарыбыздын айрым категорияларына социалдык колдоо көрсөтүлүп, жөлөк пулдардын өлчөмү 2021-жылдын 1-октябрынан 50 пайызга, 2022-жылдын 1-январынан 100 пайызга жогорулайт", — деди Жапаров.
Ал ошондой эле ушул жылдын 1-октябрынан тартып пенсиянын базалык жана камсыздандыруу бөлүктөрү индексация болорун кошумчалады.