БИШКЕК, 11-авг. — Sputnik. Акыркы статистикалык маалыматтар боюнча, уурулук Кыргызстандагы эң көп жайылган кылмыш бойдон калууда. Бул тууралуу Башкы прокуратуранын Укуктук статистика жана каттоо башкармалыгынын кылмыш жана укук статистикасы, анализ жүргүзүү бөлүмүнүн жетекчиси Эмил Чамбаев билдирди.
Ал Sputnik агенттигинин мультимедиалык маалымат борборунда өткөн "Башкы прокуратура Кыргызстандагы кылмыштуулуктун өсүшү тууралуу" аттуу брифингге катышты.
"Уурулукка өзүнчө басым жасалат. Кылмыштын бул түрү республикада кеңири жайылган. Эгер сандар менен айта турган болсок, быйыл 9 543 арыз түшкөн. Башка кылмыштардын биринде дагы мындай көрсөткүч жок", - деди Чамбаев.
Анын айтымында, быйыл катталган уурулуктун жарымынын бети ачыла элек (4 819).
Белгилей кетсек, буга чейин Улуттук статистика комитети Башкы прокуратуранын маалыматтарына таянуу менен 2021-жылдын январынан июнь айына чейин 23,5 миң кылмыш катталганын, бул өткөн жылдын ушул эле убагына салыштырмалуу бир жарым эсеге көп экенин кабарлаган. Чамбаев бул боюнча дагы брифинг учурунда түшүндүрмө берди.
Ошондой эле ал жыл сайын бир эле сан кайталана бербей турганын кошумчалады.