БИШКЕК, 1-май. — Sputnik. Кыргызстан менен Тажикстандын УКМК жетекчилери Камчыбек Ташиев менен Саймумин Ятимов чек арадагы абал боюнча өкмөт аралык комиссиянын сүйлөшүүлөрүнүн жыйынтыгын чыгарды.
Алар Баткенде журналисттерге билдирүү жасашты.
Тажикстандын УКМКсынын башчысы Саймумин Ятимов Чек ара райондорундагы трагедия эч качан кайталанбашы керек деген пикирин айтты.
"Бүгүн жемиштүү сүйлөшүү болду. Чек ара райондорундагы трагедия эч качан кайталанбашы керек. Себеби эки өлкөнүн эли бул тилкеде жашайт жана өтө ынтымактуу. Биз, саясатчылар, элибиздин тынчтыкта жашашына мүмкүнчүлүк беришибиз керек. Кыргыз-тажик жерлерине тынчтык орнотуу боюнча макулдашуу болду. Өз ара түшүнүү жана тынчтык болот деп ишенем", — деди Ятимов.
Кыргызстандын УКМК башчысы Камчыбек Ташиев эки өлкөнүн кызыкчылыгын көздөгөн 4-пунктудан турган протокол кабыл алынганын айтты.
"Биз эки өлкөнүн кызыкчылыгын көздөгөн 4-пунктудан турган протокол кабыл алдык. Элибиз башынан кыйын күндү кечирип жатат. Эки өлкө үчүн тең трагедия болду. Бардык атышууларды толук токтотуп, аскердик күчтөрдү туруктуу ордуна жайгаштыруу боюнча чечим кабыл алдык. Бүгүнкү күндөн тарта өлкөдө, өзгөчө чек арага жакын аймактарда тынчтык жана бейкуттук орнойт", — деди Ташиев.
Баткенде 28-апрель күнү кечинде чыккан чыр түнү менен күчөп отуруп эртеси да уланган. Эки тарап бири-бирин көздөй ок аткан. Атышуудан Кыргызстанда каза болгондордун саны 34кө жетип, 173 киши жабыркаган.
Бул трагедиядан улам 1-2-май Кыргызстанда аза күтүү күнү деп жарыяланды.