Жогорку Кеңешке шайлоо жараянын өткөрүүгө мурдагылардан айырмаланып бир топ санитардык эреже киргизилет. Мындай кадамдар коронавируска байланыштуу болот. Бул тууралуу Абдыжапар Бекматов Sputnik Кыргызстан радиосуна маек куруп жатып билдирди.
Анын айтымында, БШК үгүт иштери учурунда партияларды санитардык эрежелерди аткарууга милдеттендирген укуктук актыларды иштеп чыкты.
"Быйыл 4-октябрда өтүүчү парламенттик шайлоо мурдагыларынан өзгөчө болот. Анткени мыйзамда көрсөтүлгөн эрежелерге кошумча дагы санитардык тартиптер киргизилет. Мунун баары коронавирустун калк арасына жайылуусуна жол бербөө максатын көздөйт. Ал үчүн талапкерлерге үгүт иштеринин 50 пайызга чейинкисин аралыктан, ЖМКлар аркылуу жүргүзүү тапшырмасы берилет. Бул көрсөткүч мурда 30 пайыздан ашпоосу керек эле. Мындан сырткары, шайлоочулар менен жолугушуу өткөрүүнү каалашса, азыркы учурдагы талапка ылайык, бир топко 50дөн ашык эмес гана адам чогултууга жана аларды коопсуздук аралыгын сактоо менен жайгаштырууга милдеттендирилет. Бул багытта атайын укуктук актылар иштелип чыкты", — деди Бекматов.
Ал ошондой эле санитардык талаптарды аткарбаган партиялар жоопко тартыларын кошумчалады.