БИШКЕК, 14-апр. — Sputnik. ЕАЭБге мүчө өлкөлөрдүн президенттери жумушчу жыйындан кийин жыйынтык документти кабыл алды.
Жыйын видеоконференция түрүндө өттү. Анда коронавируска каршы күрөшүү жана ЕАЭБ мүчөлөрүнүн экономикалык туруктуулугун камсыздоочу чаралар талкууланды.
Төмөндө биргелешкен билдирүүдөн алынган учурларды келтиребиз:
— Пандемия менен күрөшүү иштелип чыккан кооперациялык байланыштарды үзүп, эл аралык сооданы үзгүлтүккө учуратып жана инвестициялык ишмердүүлүктү токтотуп салбашы керек;
— Бардык мамлекеттер куралдануу боюнча чыр-чатактарын, соодадагы касташууларын, санкцияларын токтотуп, бири-бири менен кызматташуусу керек;
— Дүйнөдө тамак-аш, медициналык жабдуулар, дары-дармектер, медициналык жактан жеке коргонуу жаатындагы товарларды кошкондо аларды эркин ташуу принцибин кармануу керек;
— ЕАЭБ мамлекеттери медицинаны биргеликте бекемдеп, эпидемияга каршы иш жүргүзүү алгоритмдерин чогуу изилдеп жана өркүндөтмөкчү;
— ЕАЭБ мамлекеттеринин өкмөттөрүнө, борбордук банктарына өзүнүн иштерин координациялоо, аны менен кошо калкты азык-түлүк менен камсыздоо, бизнести колдоо иштерин алып барууга тапшырма берилди.