БИШКЕК, 17-мар. — Sputnik. Билим берүү жана илим министрлиги мектеп жана коомдук жайлар текшерилет деген маалыматты төгүндөдү.
Эске салсак, коронавирусту алдын алуу максатында Кыргызстанда мектептер менен жогорку окуу жайлар үч апталык карантинге жабылган.
Ал эми бүгүн мессенжерлерде "Кошумча сабактар өткөрүлүп жатпаганын билүү үчүн мектептер текшерилет. Эгер окуучулар себепсиз эле көчөдө, дүкөндөрдө, автобустарда жүргөн болсо, ата-энелери айыпка жыгылат" деген маанидеги билдирүү тарап кеткен.
Sputnik агенттигинин кабарчысы министрликтин маалымат кызматы менен байланышып, бул билдирүү чындыкка туура келбей турганын билди.
Ошондой эле министрлик ата-энелерге колдон келишинче балдарды эл көп чогулган жерлерден оолак кармоого, саламаттыгына өзгөчө көңүл бурууга чакырат.