БИШКЕК, 13-дек. — Sputnik. Mercedes-Benz үлгүсүндөгү автоунаага жасалма номер тагып жүргөн айдоочунун сүрөтүн жарыялаган Мониторинг борборунун кызматкери Бишкек милициясынын убактылуу кармоо жайына киргизилди. Бул тууралуу ИИМдин маалымат кызматынан кабарлашты.
Бирдирмеге караганда, ИИМдин ички иликтөө кызматы Mercedes-Benz үлгүсүндөгү 01KG 578 ACD номерин тагып жүргөн автоунаа боюнча териштирүүсүн аяктады.
“А.А. аттуу кызматкер камерага түшкөн эреже бузууну өзүнүн кызматтык компьютерине көчүрүп алган. Андан соң WhatsApp тиркемеси аркылуу тааныштарына жөнөткөн”, — деп айтылат билдирүүдө.
Бүгүн, 13-декабрда, ал Жазык кодексинин 304-беренесине ("Компьютердик маалыматка мыйзамсыз жетип алуу") ылайык Бишкек шаардык милициясынын убактылуу кармоо жайына киргизилди.
Ички иликтөө кызматынын өкүлдөрү жарыяланган маалыматтар жана машиналардын фотоколлажын иликтешкен. Алар "Коопсуз шаар" долбоорунун Мониторинг борборунда маалымат менен иштөөдө эреже бузулганын аныкташкан. Кызматтык маалыматтарды башка максатта колдонгону үчүн Мониторинг борборунун операторлору А.А. менен К.К. кызматынан алынган.
Ошондой эле кол алдындагы кишилерди тийиштүү түрдө көзөмөлдөбөгөнү үчүн аталган борбордо жетекчилик кызматта иштеген төрт киши дисциплинардык жазага тартылган.