БИШКЕК, 19-ноя. — Sputnik. Социалдык тармакта тараган балдардын массалык мушташынын видеосу чындап эле 19-ноябрда, түн ичинде Чыгыш-5 кичирайонунда болгон. Бул тууралуу Бишкек шаардык милициясынын маалымат кызматынын жетекчиси Улан Жумаков билдирди.
Буга чейин социалдык тармакта балдардын мушташып жаткан видеосу тараган.
"Чыгыш-5 кичирайонундагы караоке-клубунун жанында тобу менен мушташып жаткан балдар тууралуу билдирүү 102 номерине 19-ноябрда түнкү саат 2:57де түшкөн. Окуя болгон жерге кайгуул милициясы келип, эч кимди тапкан эмес. Бирок ага карабай текшерүү учурунда үйлөрдүн биринен таяк жеген 23 жаштагы К.И. аттуу бала аныкталган", — деп айтылат маалыматта.
Милиция дарыгерлерди чакырып, бала Улуттук госпиталга алып келинген.
Аталган факты Кылмыш-жаза кодексинин 266-беренеси ("Бейбашчылык") боюнча каттоого алынган. Учурда укук коргоо органдары мушташтын башка катышуучуларын аныктоо аракеттерин көрүп жатат.