ОШ, 24-сен. — Sputnik. 25-сентябрдан баштап Ош шаарынан Өзбекстандын Анжиян шаарына маршрутка каттамы ачылат. Бул тууралуу Ош аймактык автотранспорт башкармалыгынын жетекчиси Эмил Умаров билдирди.
Анын айтымында, 2018-жылы эки өлкөнүн жетекчилеринин жолугушуусунда Ош — Анжиян каттамы боюнча сүйлөшүүлөр жүргүзүлгөн.
Тиешелүү мамлекеттик органдар тарабынан каттоо убактысы боюнча документтер такталган.
"Ош шаарындагы автобекеттен күн сайын жыйырма мүнөт аралык менен кичи автобус жүрө баштайт. Бул Ош — Анжиян жана Анжиян — Ош багытында жүргүзүлөт", — деди Умаров.
Аталган каттамдын жол киреси 100 сом.