БИШКЕК, 31-авг. — Sputnik. Ысык-Көл облусунун Кызыл-Өрүк жана Сары-Камыш айылдарынын ортосунда BMW Х-5 жана BMW-530 үлгүсүндөгү эки автоунаа кагышып, беш адам каза болду. Бул тууралуу Жол кыймылы коопсуздугун камсыздоо башкы башкармалыгынын маалымат кызматы кабарлады.
Окуя кечээ, 30-августта, саат 17.35 чамасында болгон.
"Кырсыктан беш адам мерт болуп, жарадар эки киши Балыкчы шаардык ооруканага жеткирилди. BMW X-5 автоунаасын Кант шаарында жашаган аял айдап бара жаткан. Тергөөнүн алкагында кырсык болгон учурда ал мас экени аныкталды", — деп айтылат тартип коргоо органдарынын берген маалыматында.
Сүрөттө биринчи автоунаанын экинчинин үстүнө чыгып барып токтогондугун көрүүгө болот.
Аталган факты Кылмыш жана жоруктардын бирдиктүү реестрине катталып, тергөө амалдары башталды.