БИШКЕК, 8-ноя. — Sputnik. Бишкектеги "Биринчи балдар хосписи" коомдук кайрымдуулук фондусунун имаратын суу каптап, эмерек, техникалар жарактан чыгып калды. Бул туурасында Sputnik Кыргызстан агенттигине фонддун жетекчиси Динара Аляева билдирди.
Анын айтымында, бүгүн, 8-ноябрда, эртең менен ысык суу кеткен түтүк жарылып имараттын биринчи кабатын жана жер төлөсүн суу каптаган.
"Дем алыш күн болгондуктан, бактыга жараша, ичинде балдар болгон эмес. Катуу басым менен чыккан суу имараттын ичин каптап, эмерек менен техника жараксыз болуп калды. Эми аны сатып алып, бөлмөлөрдү капиталдык ремонттон өткөрүүгө мажбурбуз", — деди Аляева.
Мындан улам дароо эле социалдык тармакта балдар хосписин калыбына келтирүү үчүн каржылык колдоо көрсөтүүнү демилгелеп чыгышты.
Белгилей кетсек, "Биринчи балдар хосписи" коомдук кайрымдуулук фонду оор илдеттен жапа чеккен балдар менен үй-бүлөлөргө медициналык, материалдык жана психологиялык колдоо көрсөтүү менен алектенет.