БИШКЕК, 28-июн. — Sputnik. Эпидемиологиялык кырдаалга байланыштуу медицина кызматкерлерин окутуудан өткөрүп, кадрдык резерв түзүлүп жатат. Бул тууралуу Республикалык ыкчам штабдын жыйынында айтылганын өкмөттүн маалымат кызматы кабарлады.
Ага ылайык, тиешелүү тапшырманы премьер-министр Кубатбек Боронов Саламаттык сактоо министрлигине берген.
Ошондой эле жыйында биринчи вице-премьер Алмазбек Баатырбеков учурда орто медициналык персоналдын да кадрдык резервин түзүү мезгил талабы болуп жатканын белгилеген.
Боронов: күз-кыш айларында оорунун күчөшүнө даяр болушубуз керек
"Бишкек менен Ош шаарларында, Чүй жана Ош облустарында коронавирус инфекциясын жуктургандардын саны өсүп жаткандыктан COVID-19га каршы күрөшүүгө дарыгерлерди гана эмес, орто медициналык персоналды да тартуу керек. Ошондуктан аларды дагы окутуудан өткөрүп, кадрдык резервин түзүү шарт", — деген Баатырбеков.
Штабдын отурумунда буга чейин кургак учукту аныктап келген GeneXpert лабораториялары да коронавирус инфекциясын тастыктоо үчүн иштей турганы айтылды. Мындай лабораториялар керектүү жабдуулар менен камсыздалды.
Өкмөттөн да COVID чыкты. Арасында премьердин кеңешчиси, бөлүм башчылар бар
Ошондой эле жеке коргонуучу каражаттарды, бет кап, кол кап чыгара турган ата мекендик ишканалардын санын көбөйтүү маселеси талкууланган. Ушул тапта өлкө боюнча төрт ишкана бет кап өндүрүүдө. Мындан тышкары, дагы эки компания жакында өз ишин баштайт. Муну менен катар жеке коргонуучу каражаттарды чыгара турган эки ишкана каттоодон өттү.
Жыйында бет каптар элге жеткиликтү болуш үчүн наркын жогорулатпай, көзөмөлгө алуу тапшырмасы коюлган.
