Жапаров "чет элдик жумушчулар каптап кетти" деген кептерге жооп берди
21:27 14.06.2026 (Жаңыртылды: 09:36 15.06.2026)
© Фото / пресс-служба кабмина КР
Жазылуу
БИШКЕК, 14-июн. — Sputnik. Президент Садыр Жапаров "Кыргызстанды чет элдик жумушчулар каптап кетти" деген сындарга жооп берди.
Мамлекет башчы бүгүн Балыкчы — Чолпон-Ата темир жолунун курулушуна капсула салып, Кыргызстанда курулуп жаткан бир катар темир жол линияларын тизмектеп, ар биринин маанилүүлүгүнө токтолгон.
Ошол эле учурда курулушта иштеп жаткандар боюнча "Кыргызстанда чет элдик жумушчулар жайнап кетти" деп кеп кылгандарга кайрылды.
Президент эгерде өлкөдө жумушчу күч менен мүмкүнчүлүктөр жетиштүү болсо, анда долбоорду мамлекет өзү эле ишке ашырарын түшүндүрдү. Буга мисал кылып бүгүн курулушу башталган Балыкчы —Чолпон-Ата темир жолун кетирди.
"Блогерлер дейбизби, оппозиция дейбизби, же өзүн көрсөткөн популист саясатчылар дейбизби, “каптап кетти, жайнап кетти” деген сөздөрдү чыгарып, тоскоолдук жаратып жатышат. Ушундайларга чекит коюп, кескин токтотушубуз керек. Инженерлерибиз жок, тажрыйба жок, өзүбүздүн колубуздан келбеген нерселерди кошуна мамлекеттерден суранып, жасатып жатабыз. Ошол эле мезгилде биз дагы бекер отурган жерибиз жок, инженерлерибизди, курулушчуларыбызды окутуп, тажрыйбасын арттыруудабыз. "Өзүбүз курабыз" деп жата берсек, биздин инженерлердин курулуштары 15-20 жылда араң даяр болот", — деди ал.
Мамлекет башчы блогерлерди чагымчылык аракеттерден оолак болууга чакырды.
