12 жылдык окууда 1-классты бүткөн окуучу эмнелерди билиши керектиги тизмектелди
12:38 03.06.2025 (Жаңыртылды: 12:54 03.06.2025)
Жазылуу
БИШКЕК, 3-июн. — Sputnik. Кыргыз билим берүү академиясынын президенти Назира Дүйшеева Sputnik агенттигинин маалымат борборунда өткөн 12 жылдык билим берүүнүн өзгөчөлүктөрүнө арналган брифингде 1-классты аяктаган бала кандай билим, жөндөм жана көндүмдөргө ээ болушу керектигин санап берди.
Анын айтымында, окуучу аты-жөнүн, ата-энесинин атын, жашын, кесиби тууралуу билиши керек.
"Кыргызстандын мамлекеттик символдорун, борборун, эпостогу Манас баатырды таанып, ден соолук, гигиена, сезүү органдары жана алардын функциялары тууралуу түшүнүгү болушу шарт. Ошондой эле окуучу коомдук жайда өзүн туура алып жүрүү, китепти аяр пайдалануу, тартип сактоо, жаңы сөздөрдү колдонуу, суроо берип жана жооп кайтаруу, сүйлөм түзүү, өз тажрыйбасынан окуя баяндап берүү көндүмдөрүнө ээ болушу зарыл. Мындан тышкары, калем сапты туура кармоо, үндөрдү таануу, сөздү муунга бөлүү, геометриялык фигураларды айырмалоо, сүрөт тартуу, күн тартибин жана жуманын күндөрүн билүү сыяктуу жөндөмдөрдү өздөштүрүшү керек. 20га чейин сандарды билип, 100гө чейин он-ондон санай алышы зарыл", — деди Дүйшеева.
Мындан тышкары, 2-класска көчө турган балдар жөнөкөй диалогдорду түзө билип, өзүн жана жакындарын сүрөттөп, ырдап, ыр айтып, башка маданияттарга карата толеранттуу болуп калышы керектиги кошумчаланды.
