Мамытов: ИДПны беш жылда эки эсеге көтөрсө болот
© Sputnik / Арууке Амирдинова
Жазылуу
Мамлекеттик башкаруу академиясынын жаңы экономика боюнча илим-изилдөө кафедрасынын жетекчиси, экономист Улукман Мамытов өлкөнүн алдыдагы беш жылга койгон экономикалык пландарына саресеп салды.
Ички дүң продукцияны беш жылда 30 миллиард долларга жеткирүү реалдуу план. Бирок бул үчүн экономиканы татаалдаштырыш керек. Мындай пикирин Улукман Мамытов Sputnik Кыргызстан радиосуна маек куруп жатып билдирди.
Анын айтымында, учурдагы Кыргызстандын экономикасы абдан жөнөкөй секторлордон түзүлгөн.
"Кыргызстан экономикалык жаатта беш жылдык планын түзүп, алдыга амбициялуу пландарды койду. Тактап айтканда, 2030-жылга карата өлкөнүн ички дүң продукциясын 30 миллиардга жеткирүү, сырткы карызды ИДПнын 60 пайызынан ашырбоо, өнүгүү индекси боюнча алдыңкы 100 өлкөнүн катарына кирүү сыяктуу дымактуу ойлор айтылды. Албетте, муну ишке ашырыш оңойго турбайт, бирок жасаса болот. Ал үчүн сырттан келген инвестицияларга, туризмге таянбай оор өндүрүштү күчтөндүрүү зарыл. Өлкөлөрдүн өнүгүү тарыхы көрсөткөндөй, машина курууга жетишкен өлкө экономикасын бутка тургузуп алган мамлекет катары сыпатталат. Андыктан биз да өтө майдаланып кеткен тармактарды бириктирип, жөнөкөй экономикадан татаал экономикага кадам шилтешибиз керек. Космоско кемелерди кура албасак да машина куруу багытын колго алып, өлкөгө ири заводдордун ачылышын шартташыбыз зарыл. Мына ошондо чоң секириктер болот", — деди Мамытов.
Ал ири завод, фабрикаларды ишке киргизүүдө Россия, Кытай мамлекеттери мыкты шериктеш болуп бере аларын кошумчалады.
