Жаңылыктар. Чыгарылыш 17:00

Жаңылыктар. Чыгарылыш 17:00
Жазылуу
Экономика жана коммерция министрлиги активдерди ыктыярдуу легалдаштыруу өнөктүгүн жыл этегине чейин узартууну сунуштоодо. Тиешелүү мыйзам долбоору коомдук талкууга чыгарылды. Бийлик аталган демилгенин инвестицияларды көбөйтүү, көмүскө экономиканын үлүшүн азайтуу, активдердин сакталышынын кепилдиктерин камсыз кылуу жана ээлерин мамлекеттик органдар тарабынан куугунтуктоолордон коргоо сыяктуу бир катар максаттары болгонун эске салды."Мыйзамдын максатын, ошондой эле экономиканы көмүскөдөн чыгарууга багытталган комплекстүү чараларды эске алуу менен мүлктү ыктыярдуу декларациялоо мөөнөтүн 2024-жылдын 31-декабрына чейин узартуу сунушталууда", — деп айтылат маалыматта.
*Бир күн мурун "Беш-Сары" ЖЧКсынын директору, Бишкек шаардык кеңешинин депутаты Наргиза Жолдошбаева кармалып, УКМКнын убактылуу кармоочу жайына киргизилди. Бул тууралуу УКМКнын маалымат кызматы билдирди. Эске салсак, анын атасы Жогорку Кеңештин депутаты Камчыбек Жолдошбаев мамлекетке келтирген 150 миллион сомдук зыяндын ордун толтуруп, эч жакка чыкпоо боюнча тил кат менен абактан бошотулган. Атайын орган "Беш-Сары" соода комплексинин жетекчилигине алдамчылык жана ири өлчөмдөгү салыктан качуу боюнча айып тагууда. "2023-жылдын ноябрында компетенттүү органдар тарабынан жүргүзүлгөн түшүндүрүү иштеринен кийин "Беш-Сары" ЖЧКсынын директору ишкерлер үчүн ижара акыны 30 пайызга төмөндөткөн, бирок май айынан баштап ал мурдагы бааларды кайтарууну көздөгөн. Мындай кадам "Беш-Сары" соода түйүнүндөгү ишкерлердин арасында нааразычылыктын өсүүсүнө түрткү болгон", — деп айтылат маалыматта.
Кара-Суу районунда салык кызматкери 100 миң сом өлчөмүндө пара алып жаткан жеринен кармалды. Бул тууралуу УКМКдан билдиришти.Маалыматка ылайык, атайын кызматка ишкер кайрылып, Кара-Суу районунун салыкчылары өлкөгө алып келинген тогуз автоунаанын 650 миң сом салыгын жашыргандыгы үчүн 100 миң сом пара талап кылганын маалымдаган.Факт боюнча текшерүү иш-чараларынын жүрүшүндө акча каражатын Ош облусунун Кара-Суу райондук салык кызматынын бөлүм башчысы К.Р.Т. опузалап талап кылгандыгы аныкталган.Шектүү 100 миң сом пара алып жаткан жеринен 27-апрелде кармалып, УКМКнын тергөө абагына киргизилди.
Кыргыз-Россия Славян университетинде жүргүзүлгөн аудиттин жыйынтыгы боюнча материалдар УКМКга өткөрүп берилгенин окуу жайдын маалымат кызматы билдирди. "Кыргызстандын жана Россиянын эсеп палаталары тарабынан жүргүзүлгөн иликтөөлөр КРСУнун мурдагы ректору Владимир Нифадьевдин жетекчилигинде бир топ мыйзам бузуулар болгонун аныктады жана аудит бардык багыттар боюнча жүргүзүлүп, 2020-жылдан 2022-жылга чейинки мезгилди камтыды", — деп айтылат маалыматта.Аудиттин жүрүшүндө интеллектуалдык менчикти уурдоо жана көп жылдык изилдөөлөрдүн жыйынтыгын жеке бизнеске өткөрүп берүү фактылары аныкталганы белгиленди. КРСУнун мыйзамсыз иш-аракеттеринин натыйжасында жалпысынан 500 миллион сомдон ашык зыян келтирилген."Мурдагы жетекчилик бир нече жылдар бою ЖОЖдун кызматкерлеринин эмгек акысын аныктоо жаатындагы мыйзамдарды одоно бузуп, студенттердин санын да көбөйтүп келген. Бул каржылык мыйзам бузуулар деңиздеги айсберг гана", — деди маалымат кызматы.
Жаңылыктар түрмөгү
0