Кыргызстанда кене энцефалити менен ооругандар көбөйүүдө
© Sputnik / Асель Сыдыкова
Жазылуу
Мамлекеттик санитардык-эпидемиологиялык көзөмөл бөлүмүнүн паразитологу Гүлнара Минбаева оорунун кесепети ден соолуктун бузулушуна, майыптыкка жана өлүмгө чейин алып келерин айтты.
Кенеге чактыргандардын саны жылдан-жылга көбөйүп жатат. Былтыр 940 адам кайрылса, анын 29унан кене энцефалити аныкталган. Бул тууралуу Гүлнара Минбаева Sputnik Кыргызстан радиосуна маек куруп жатып билдирди.
Кыргызстанда кене энцефалити менен ооругандар көбөйүүдө
Анын айтымында, кене чаккан маалда аны чыгаруу үчүн эч качан элдик методдорду колдонбоо керек. Анткени бул өтө кооптуу.
"Акыркы учурда кене энцефалити менен ооругандардын саны көбөйүүдө. Салаштырсак, 2010-жылы 286 адам кайрылса, былтыр 940 киши кенеге чактырган. Анын 29унан кене энцефалити тастыкталган. Ооруларды алдын алуу департаменти тарабынан жыл сайын алдын ала эмдөөлөр жүргүзүлөт. Кененин өлкөдө 17ден ашык түрү бар. Бирок иксодос персулкатус деген түрү гана вирусту алып жүрүүчү болуп эсептелет. Кене чаккан маалда адам жетиден 14 күнгө чейинки аралыкта башы ооруп, дене табы көтөрүлүп, кускусу келип, шалдырап, өзүн жаман сезет. Бул учурда дароо дарыгерге кайрылуу зарыл. Эгерде кене чакканын байкап калсаңар эч убакта майды колдонбогула. Анткени эң коркунучтуу вирус анын шилекейинде жайгашкан. Май куйган учурда ага кислород жетишпей, соруп аткан канды чачыратып, аба жутууга аракет кылат. Ошол маалда биз шилекейин түкүргөнгө жардам берип, кан аркылуу вирусту жугузуп алабыз. Кенени кылдаттык менен ооз көңдөйү калып калбагандай кылып жип менен алып коюу керек. Аны алгандан кийин ыргытып жибербей лабораторияга алып баруу туура", — деди Минбаева.
Ал ошондой эле кене чакпас үчүн коргонуучу кийим жана алдын ала териге аларды жолотпоочу дарыларды сүйкөп алуу керектигин кошумчалады.
