Ымыркайда жүрөк кемтиги эмнеден улам пайда болот? Балдар кардиологунун жообу
© Sputnik / Акбар Акжигитов
Жазылуу
Балдар кардиологу Айбек Арзыкулов тубаса жүрөк кемтигинин пайда болуу себептери жана ооруну алдын алуу жолдору тууралуу айтып берди.
Ымыркайдын жүрөгү курсакта үч айлыгында эле калыптанып бүтөт. Азыр УЗИнин жардамы менен ичтеги балада жүрөк кемтигинин бар-жогун аныктоого болот. Эгер кемтиктин жеңил түрү болсо аялга төрөгөндөн кийин өзү бүтөлүшү же операция жасалышы мүмкүн экендиги эскертилет. Кыргызстанда жарык дүйнөгө келген 1000 баланын ичинен алтоо-жетөөсү тубаса жүрөк кемтиги менен төрөлөт. Бул тууралуу Айбек Арзыкулов Sputnik Кыргызстан радиосунун эфиринде маек куруп жатып билдирди.
Ымыркайда жүрөк кемтиги эмнеден улам пайда болот? Балдар кардиологунун жообу
Анын айтымында, дарт клапандардын бузулушунан улам тубаса болот жана ар кандай оорулардан улам өрчүйт.
"Жүрөктүн тубаса кемтигин генетика, түйүлдүк кезде өнүгүүнүн бузулушу, кош бойлуулук учурундагы жугуштуу вирустук оорулар жана эненин кош бойлуу кезинде алган жаракаты шарттайт. Ошондой эле тукум куучулук фактору да бар. Мындай илдети бар адамдар дем алганда кыйналып, аритмия болуп, чарчап, денеси көгөрүп, башы айлана берет. Статистикалык маалыматтарга ылайык, тубаса жүрөк кемтигинин болжол менен 80 пайызы бала чоӊойгон сайын бүтөлүп, жоголуп кетиши мүмкүн. Бирок туура дарылоо жана хирургиялык кийлигишүүнү талап кылган түрү да бар. Эгер балаңызда жүрөк кемтиги аныкталса дүрбөлөңгө түшүүнүн кереги жок. Кыргызстанда балдар кардиологиясы көпчүлүк кемтиктерди айыктырууга боло турган деңгээлге жетти. Эң башкысы, ооруну өз убагында аныктап, күчөп кетишине жол бербөө зарыл. Себеби жүрөктүн сол жагындагы клапан ооруларында биринчи кезекте өпкө жабыркайт. Анткени кан жүгүрбөй, дем кыстыгат. Мындан улам бейтаптын башы айланып, эсин жоготуп, стенокардия пайда болот. Ал эми жүрөктүн оң клапандарынын иши бузулган учурда (трикуспид жана өпкө клапандары) жалпы кан айлануу начарлайт. Мында өпкөдөн башка бардык органдар жабыркап, бут шишип, боор чоңоюп кетет", — деди Арзыкулов.
Ал баланын ден соолугу ата-энеден көз каранды болгондуктан активдүү жашоо образын карманып, туура тамактанып, кош бойлуулукту пландоо керектигин кошумчалады.
