Улгайган адамдардын тамактануусу кандай болушу керек?
© Sputnik / Асель Сыдыкова
Жазылуу
Республикалык ден соолукту чыңдоо жана массалык коммуникация борборунун дарыгери Айзирек Галдыбаева карылык куракта туура тамактануунун эрежелерин айтып берди.
Карыганда туура тамактанууга жана сапаттуу тамак-ашка өзгөчө көңүл буруу керек. Тамак-ашта белок, микроэлементтер, витаминдер көп болушу зарыл. Бул тууралуу Айзирек Галдыбаева Sputnik Кыргызстан радиосунун эфиринде маек куруп жатып билдирди.
Улгайган адамдардын тамактануусу кандай болушу керек?
Анын айтымында, кары адамдар туз, кумшекерди аз колдонушу керек.
"Улгайган адамдар үчүн рационалдуу тамактануу ден соолукту сактоого, психикалык жактан активдүү болууга, ооруларга жана зыяндуу экологиялык факторлорго туруштук берүүгө, узак өмүр сүрүүгө шарт түзөт. Жаш өткөн сайын адамдын денеси белгилүү бир өзгөрүүлөргө дуушар болуп, жалпы организм картаят. Анын ичинде улгайган адамдарда зат алмашуу жайлап, баалуу заттардын сиңүүсү начарлайт. Организмдин кээ бир функционалдык, анын ичинде тамак сиңирүү менен байланышкан мүмкүнчүлүктөрү төмөндөйт. Ооруларды алдын алуу үчүн рациондо балык жана эттен жасалган тамактар болушу керек. Ал эми малдын майын көп колдонгон болбойт. Бул атеросклероздун өнүгүшүнө алып келиши мүмкүн. Организмдин толук кандуу иштеши үчүн күнүмдүк рационго ар кандай баалуу элементтерге бай тамактарды киргизүү керек. Продукциялар жогорку сапатта жана оптималдуу өлчөмдө болушу зарыл. Тамак-аш улгайган адамдын энергия чыгымын камсыз кылуучу калорияларды камтууга тийиш. Чийки жашылча-жемиш канчалык көп болсо, улгайган адам ошончолук пайдалуу заттарды алат. Тамак-ашты кайра иштетүүгө катышкан ферменттер жаш өткөн сайын начар иштейт. Андыктан консерва, жарым фабрикаттар жана ышталган эттен баш тарткан оӊ. Жеңил жана оңой сиңирүүчү тамакка басым жасоо сунушталат", — деди Галдыбаева.
Ал улгайган адамдар дарыгери менен кеӊешип кошумча витаминдерди да ичсе болорун кошумчалады.
