Арзиев: ишкерликти өнүктүрүүгө коомдун да таасири чоң
© Sputnik / Асылбек Бактыбеков
Жазылуу
Химиялык жууп-тазалоочу каражаттарды өндүргөн ишкер Аман Арзиев жергиликтүү өндүрүштү колдоо максатында мамлекеттик сатып алууларда ата мекендик продукцияларга басым жасоо саясаты зарылдыгын айтты.
Өлкөдө өндүрүштүн көбөйүшү үчүн саясий туруктуулукту гана камсыздоо жетишсиз. Андан сырткары, мамлекеттин колдоосу, коомдун аң-сезимдүү тандоосу да чоң роль ойнойт. Мындай пикирин Аман Арзиев Sputnik Кыргызстан радиосуна маек куруп жатып билдирди.
Арзиев: ишкерликти өнүктүрүүгө коомдун да таасири чоң
Анын айтымында, Кыргызстанда, тескерисинче, сырттан кирген товарларга ыңгайлуу шарттар түзүлгөн.
"Күнүмдүк керектелчү каражат, тамак-аш өндүрүүдө ишкерлер түрдүү кыйынчылыктарга туш болушат. Биринчиден, бизде протекционизм, тактап айтканда, импорт саясатын жүргүзүү чабал. Жергиликтүү өндүрүшчүлөргө ыңгайлуу шарт түзүүнүн ордуна мында сырттан келген товарлар биздин рынокту ээлеп алуусуна жол ачык. Ал эми алар өз кезегинде маркетинг менен эле керектөөчүлөргө өз товарын жеткире алышат. Бул жерде сапат тууралуу сөз да болбой калат. Ата мекендик өндүрүш андан 10 эсе сапаттуу болсо деле сатып алуучулар ошол эле жарнаманын курмандыгы болуп кете беришет. Өкмөт жергиликтүү өндүрүшчүлөрдү бул багытта колдоп, импортко протекционизмди киргизүүсү зарыл. Ошону менен катар эле мамлекеттик сатып алууларды жүргүзүүдө жергиликтүү продукция гана алынсын деген башка мамлекеттердикиндей эрежебиз жок. Андыктан өткөрүлгөн тендерлердин 95 пайызында импорттолгон товарлар кирет. Экинчиден, жеңилдетилген насыялар берилип, коммуникациясы бар, логистикага ыңгайлашкан зоналар ачылып, өндүрүшчүлөр бир жерге топтолсо жакшы болмок. Завод, фабрикалардын топтомунан турган эркин экономикалык зоналарды куруу шарт. Үчүнчүсү — кадр маселеси. Мында да орто билимдүү адистерди таппай калабыз, алар өтө аз, окуп, билим алып чыккандары маянасы көп чет өлкөлөргө чыгып кетишет. Атаандаштыкка туруштук бере албаган, өкмөтү жана коому тарабынан колдоо таппаган жергиликтүү өндүрүшчүлөр аларга көп маяна төлөп кармап кала алышпайт. Бул жаатта да мамлекеттик саясат болушу шарт. Ошондой эле коомдун "ата мекендик продукцияны колдойлу" деген аң-сезими, дүкөндөрдүн жергиликтүү продукцияларга жагымдуу шарт түзүүсү да кадимки көрүнүшкө айлануусу зарыл", — деди Арзиев.
Ал өлкөдө өндүрүш ачып иштетүүнү каалаган ишкерлердин дээрлик бардыгы мекенчил болорун кошумчалады.
