Семирүү — олуттуу оору. Кантип алдын алуу керек
© Sputnik / Асель Сыдыкова
Жазылуу
Иса Ахунбаев атындагы КММАнын гигиеналык дисциплиналар кафедрасынын доценти, балдар жана өспүрүмдөр гигиенасы курсунун башчысы, медицина илимдеринин кандидаты Жумабек Сыдыков семирүүнү алдын алуу керектигин айтты.
Ашыкча тамактанып, аз кыймылдоо семирүүгө алып келет. Мындайча айтканда, учурда адам ичип-жегенине жараша энергия сарптабаса организмге чогулган ашыкча калория майга айланат. Ошондой эле генетикалык бузулуу же тукум кууган учурлары бар. Бул тууралуу Жумабек Сыдыков Sputnik Кыргызстан радиосунун эфиринде маек куруп жатып билдирди.
Семирүү — олуттуу оору. Кантип алдын алуу керек
Анын айтымында, ашыкча салмакты алдын алуу үчүн тамактануу режимин жөнгө салып, басып-туруп жегенди токтотуу керек.
"Адамдын салмагы идеалдуу салмактан 15-20 килограммга ашык болсо, бул биринчи даражадагы семирүү деп белгиленет. Нормалдуу салмак дене массасынын индексинин (ИМТ) калькулятору менен аныкталат. Ал эми экинчи даражадагы семирүүдө салмак идеалдуудан 25-31 килограммга ашып кетет. Үчүнчү даражадагы семирүүдө 45-51 килограмм ашыкча болот. Эгер салмак идеалдуу салмактан 51 килограммдан да ашып кеткен болсо, бул төртүнчү даражадагы семирүү делет. Семирүү — бул олуттуу оору, аны алдын алууну керек. Семирүүдөн улам кант диабети, ар кандай жүрөк оорулары, анын ичинде инфаркт, кан басымдын жогору болушу жана инсульт, өт оорусу, боордун циррозу, артрит, омурткалардын грыжасы, уйку без оорусу, рак оорулары жана башка оорулар пайда болот. Ашыкча салмактан арылуу үчүн тамактанууну жөнгө салып, фаст-фуд, майды азайтуу, активдүүлүктү жогорулатуу жана генетикалык бузулуу же тукум кууган, эндокриндик ооруларды дарылатуу зарыл", — деди Сыдыков.
Ал семирүүнү алдын алуу үчүн тамакты ашыкча жеп алуу адатынан арылуу жана углеводду азайтуу керектигин кошумчалады.
