Адылова: энесин атасы урганын көргөн баланын психологиясы жабыр тартат
11:19 19.12.2023 (Жаңыртылды: 11:20 19.12.2023)
© Sputnik / Жантай Макенов
Жазылуу
ИИМдин Коомдук коопсуздук кызматы башкармалыгынын балдар иштери жана контролдоо боюнча бөлүм башчысы Нуржан Адылова үй-бүлөлүк зомбулуктан балдар психологиялык жактан жабыркап, кесепети кийинки жашоосуна тиерин айтты.
Үй-бүлөлүк зомбулук фактыларын жоюуда аймактарда абал оор бойдон калууда. Бардык көйгөй менен милиция жалгыз калган кездер болот. Бул тууралуу Нуржан Адылова Sputnik Кыргызстан радиосуна маек куруп жатып билдирди.
Адылова: энесин атасы урганын көргөн баланын психологиясы жабыр тартат
Анын айтымында, үй-бүлөдө ур-токмок жеген көбүнесе аялдар болсо, ага күбө болгон, зомбулукту көрүп чоңойгон балдары психологиялык жактан жапа чегишет.
"Аймактарда үй-бүлөлүк зомбулук менен күрөшүү шаарларга салыштырмалуу оор. Анткени, биринчиден, кошуна, тууган-уруктары намыс көрүп же кайдыгерликтен улам тартип сакчыларга кабарлабай коюшат. Абал курчуп отуруп өрчүп кеткенде, кырсыкка келип жеткенде гана ачыкка чыгарышат. Үй-бүлөдө жашы жете элек балдар болгон учурда социалдык коргоо кызматкерлерине чалсак "менин жумушум кечки алтыда эле бүткөн" деп келбей койгондору да кездешет. Кээде катуу таяк жеп калган аялдарды ооруканага жеткирүү керек болот. Алыскы айылдарга тез жардам унааларынын жетиши кыйын. Мындайда милиция кызматкери балдарын ээрчитип алып, аялды ооруканага жеткирип, анан зомбулук көрсөткөн киши менен иш алып барууга мажбур. Туугандарына чалып балдарын алып кетишин суранабыз же мектеп жамаатына, педагогдорго өткөрүп беребиз. Мыйзам боюнча, милиция кызматкери мындай учурда баланы үч саатка чейин гана өзү менен алып жүрө алат. Андан соң тиешелүү мамлекеттик органдарга өткөрүп бериши керек. Бала ур-токмокко кабылбаса да, энесин атасы уруп жатканын көрүп, психологиялык жактан жабыр тартып калат. Ал дароо билинбейт. Мындай балдар менен учурунда психологдор иштешиши зарыл. Айылдарда андай адистер жокко эсе. Андыктан аймактарда үй-бүлөлүк зомбулук менен күрөшүү оор бойдон калууда", — деди Адылова.
Ал үй-бүлөлүк зомбулуктун күбөсү болгон балдар менен социалдык кызматкерлер өз учурунда иштешсе келечегине жакшы болорун кошумчалады.
