Орозбаев: Кыргызстан үчүн 452 айыл өкмөт көп, ирилештирүү зарыл
© Sputnik / Асел Акмат
Жазылуу
Жергиликтүү өз алдынча башкаруулар союзунун директору Бектурган Орозбаев административдик-аймактык реформанын зарылдыгы тууралуу айтып берди.
Кыргызстан үчүн 452 айыл өкмөт көп, аларды ирилештирүү зарыл. Ошондуктан административдик-аймактык реформа жүргүзүлүүдө. Бул тууралуу Бектурган Орозбаев Sputnik Кыргызстан радиосуна маек куруп жатып билдирди.
Орозбаев: Кыргызстан үчүн 452 айыл өкмөт көп, ирилештирүү зарыл
Анын айтымында, административдик-аймактык реформанын концепциясында айыл өкмөттөрдү бириктирип, күчтүү муниципалитеттерди түзүү максаты турат.
"452 айыл өкмөтү көп, анын ичинде колхоз-совхоздордун негизинде түзүлгөндөрү бар. Мисалы, Нарында 63 айыл бириктирилип, 27 болду. Айрым учурда 1 500, башкаларында 40-50 миң калкы бар айыл өкмөттөр кездешет. Тогуз-Торо районунда бир айыл экиге бөлүнгөн. Ала-Букадагы Көк-Таш айылынын бюджети кен бар болгондуктан 150 миллион сом, ал эми жанындагы Көк-Серектики 10 миллион сом. Мындай мисалдар көп, ошондуктан экономикалык жактан бири-бирин тартып кете ала турган айылдарды караш керек. Мамлекет болсо 20-30 жыл келечекке карап, иш алып барууда, бирок элетте "бул уруу менен кошула албайм", "алыс болуп калат", "жайыт бөлүшпөйм" деген сыяктуу күнүмдүк кызыкчылыкты карашууда. Демография өсүп жатат, демек, ирилештирүү зарыл. Бирок бул жерде ресурстар туура бөлүштүрүлүп, күчтүү муниципалитеттерди түзүү жагы каралышы керек. Айылдар канчалык майда болсо, муниципалдык ишкана түзүү ошончолук пайдасыз. Жергиликтүү маселелер чечилбесе карапайым калкка бийликтин иштегени сезилбейт. Бул реформа татаал жүрөт, бирок 5-6 жылда жакшы жылыштар болот", — деди Орозбаев.
Ошондой эле ал мамлекеттик кызматтарды санариптештирүү реформаны ишке ашырууну жеңилдетерин кошумчалады.
