Жаңы жылдан баштап патент менен соода жүргүзүү токтотулат. Кимдерге тиешелүү?
Жазылуу
Патенттин негизинде соода жүргүзгөн ишкерлер 2024-жылдын 1-январына чейин салык салуунун башка режимине – жалпы салык режимине же бирдиктүү салыкка өтүшү керек.
БИШКЕК, 11-ноя. — Sputnik. Мамлекеттик салык кызматы 2024-жылдын 1-январынан тартып патенттин негизинде соода ишин жүргүзүү токтотуларын эскертти.
Билдирмеге ылайык, жаңы жылдын биринчи күнүнөн баштап иштин төмөнкү түрлөрүнө карата патент берилбейт:
базар жана кичи базарда чекене сатуу;
дүкөндө чекене сатуу;
дүкөндөн, соода борборунан жана базардан тышкары чекене сатуу;
соода түйүндөрүн пайдалануу менен соода борборлорунда чекене сатуу;
күркөлөрдү, павильондорду, контейнерлерди, вагондорду, лотокторду, чатырларды, боз үйлөрдү, кол арабаларын, бастырмаларды жана башка убактылуу темир конструкцияларын пайдалануу менен базардан тышкары автоунааларга кошумча бөлүктөрдү жана материалдарды сатуу;
Тез татым (фаст-фуд) тармагынын азыктарын сатуу;
үй жаныбарларын багуу жана сатуу;
нан жасоо (сатуу);
үйдө кум блокторду, шлакоблокторду жана брусчаткаларды даярдоо (сатуу);
өзү жасаган кол өнөрчүлүк ишинин (элдик көркөм кол өнөрчүлүк) буюмдарын сатуу;
мүрзөгө коюлуучу эстеликтерди, постаменттерди жана коштоочу элементтерди жасоо, сатуу;
сүрөтчүлөрдүн ишмердүүлүгү, анын ичинде сүрөт жана портрет сатуу.
"Патенттин негизинде соода жүргүзгөн ишкерлер 2024-жылдын 1-январына чейин салык салуунун башка режимине – жалпы салык режимине же бирдиктүү салыкка өтүшү керек. Бирдиктүү салыктын ставкалары жылдык кирешенин көлөмү 8 миллион сомго чейин болсо 0 пайыз, ал эми 30 миллион сомго чейин болсо 0,5 пайыз, 50 миллион сомго чейин болсо бир пайызды түзөт", — деп айтылат мекеменин маалыматында.
Бирдиктүү салыктын негизинде иштегендер ККМди пайдаланууга жана камсыздандыруу төгүмдөрүн төлөө боюнча талаптарды, ошондой эле бир катар башка милдеттенмелерди аткарууга милдеттүү. Башка салык режимине өтүш үчүн ишкерлер салык органына арыз (кагаз жүзүндө же онлайн) менен кайрылышы керек.
Кошумча маалыматты жергиликтүү салык органдарынан, 116 номери аркылуу же www.sti.gov.kg сайтынан алууга болот.
8 Баш оона 2023, 20:05
