Инсульт болгондо 3-4 саатта берилген жардам өмүрдү сактап калат
© Sputnik / Асель Сыдыкова
Жазылуу
Улуттук госпиталдын №2 неврологиялык бөлүмүнүн дарыгери Дилбар Курманалиева инсультту алдын алуунун эң жакшы жолу мүмкүн болушунча сергек жашоо образын сактоо экенин айтты.
Инсульт буту-колдун шал болушуна, сүйлөө, көрүү, эс тутумдун начарлашына, оор учурларда майыптыкка, ал тургай өлүмгө кептей турган оору. Бул тууралуу Дилбар Курманалиева Sputnik Кыргызстан радиосунун эфиринде маек куруп жатып билдирди.
Инсульт болгондо 3-4 саатта берилген жардам өмүрдү сактап калат
Анын айтымында, инсульттан каза болгондордун саны өсүүдө.
"Инсульт учурунда (мээдеги кан айлануунун бузулушу) мээнин белгилүү бир бөлүгүндө кандын агымы азаят же таптакыр токтойт. Инсульт мээ функциясынын начарлашынын негизги себептеринин бири. Илдеттин ишемиялык жана геморрагиялык деген эки түрү бар. Ишемиялык инсультта кан уюп, мээдеги артерияны же капиллярды тосуп калат. Бейтаптардын 80 пайызында ишемиялык инсульт кездешет. Геморрагиялык инсультта мээнин кан тамыры жарылып, мээге кан куюлат. Эки учурда тең мээнин жабыркаган аймагындагы клеткалар жетиштүү кычкылтек жана керектүү азыктарды албагандыктан өлүп баштайт. Бул учурда алгачкы 3-4 сааттын ичинде берилген жардам кыйынчылыктарды алдын алып, өмүрдү сактап калат. Инсульт жүрөк-кан тамыр системасынын ооруларынын фонунда пайда болот. Мисалы, атеросклероз, гипертония, жүрөктүн ар кандай патологиялык абалы. Алар кандын уюшун шарттайт. Ошондой эле кант диабети менен ооругандар, кан оорулары, рак жана жугуштуу оорулар менен жабыркагандар, кан басымы жогору, ашыкча салмактуу адамдар тобокел тобунда. Инсультту алдын алуунун эң жакшы жолу — мүмкүн болушунча сергек жашоо образын сактоо", — деди Курманалиева.
Ал инсульт менен күрөшүүнүн дүйнөлүк күнүнө карата кыргызстандыктар Улуттук госпиталдын №2 неврологиялык бөлүмүндө 28-октябрда саат 9:00дөн 15:00гө чейин акысыз текшерүүдөн өтө алышарын кошумчалады.
