Самудинов: Тарых музейинде 100 миңдей экспонат түп нускада сакталган
© Sputnik / Асылбек Бактыбеков
Жазылуу
Улуттук тарых музейинин илим жана агартуу бөлүмүнүн башчысы Өмүрбек Самудинов акыркы кезде эл арасында музей маданияты калыптанып келе жатканын айтты.
"Өмүр бизден өтүп кетсе, эл эмгектен эскерсин" дегендей, согуш, анын адамзатка тийгизген кесепети, жашоого берген сабагы унутулбашы керек. Ошондуктан Улуттук тарых музейи реконструкциядан кийин тарыхтагы орду чоӊ болгон окуя — Улуу Ата Мекендик согушка арналган ири бөлүм уюштурган. Бул тууралуу Өмүрбек Самудинов Sputnik Кыргызстан радиосунун эфиринде маек куруп жатып билдирди.
Тарыхчы: жаштарга Улуу Ата Мекендик согуш жөнүндө туура маалымат бериш керек
Тарыхчы: жаштарга Улуу Ата Мекендик согуш жөнүндө туура маалымат бериш керек
Анын айтымында, Улуттук тарых музейиндеги 100 миӊден ашык экспонаттын көбү түп нускада сакталган.
"Улуу Ата Мекендик согушка арналып түзүлгөн бөлүмдө бир гана согушка катышкан адамдардын эмес, оорукта эмгектенген кызматкерлердин каармандыгын чагылдырган буюмдары, кыргыз интеллигенциясынын согушка кошкон салымы, маданият өкүлдөрүнүн тарыхый окуя тууралуу жазган материалдары коюлган. Кыргызстандыктар жана чет элдик коноктор тарыхый окуя тууралуу сакталган буюмдар, жазуу, сүрөт түрүндөгү материалдар аркылуу жеткиликтүү маалымат ала алышат. Улуттук тарых музейи Борбор Азиядагы музейлерден тарыхый буюм, экспонаттардын көбү түп нускада сакталышы менен өзгөчөлөнөт. Алсак, Улуу Ата Мекендик согушта эрдик көрсөткөн белгилүү генерал-лейтенант Калыйнур Үсөнбековдун аскердик формасы, китеби, советтик артиллерист, Советтер Союзунун Баатыры наамын алган кыргыздын залкар инсаны, генерал-майор Дайыр Асановдун Ардак баракчасы, аскердик формасы, орден, медалдары, колдонгон буюмдары коюлган. Негизинен согуштун катышуучулары жана оорукта эмгектенген баатырлардын көпчүлүгүнүн буюм-тайымдары биздин музейде бар. Мисалы, советтик айыл чарба кызматкери, кызылчачы, Социалисттик Эмгектин Баатыры Керимбүбү Шопокованын кийими, кол күрөктөрү, мамлекеттик жана коомдук ишмер, саясатчы Иманалы Айдарбековдун кызы, медицина кызматынын полковниги Рафа Айдарбекованын сүрөттөрү, өздүк буюмдары, жарадарларды дарылоодо колдонгон медициналык каражаттарын көрө аласыздар", — деди Самудинов.
Ал акыркы жылдары эл арасында музей маданияты калыптанып, тарыхка болгон кызыгуу күчөп, музейге келген коноктор ата-бабалардын эрдигине таазим этип, келечек муундун таалим-тарбиясына бул жакшы таасир этип жатканын кошумчалады.
