Осмоналиев: эми мультфильм тартууга 23 млн. сом бөлүнөт
© Sputnik / Асель Сыдыкова
Жазылуу
Президентке караштуу Мамлекеттик тил жана тил саясаты улуттук комиссиясынын төрагасы, профессор Каныбек Осмоналиев мамлекеттик тилди өнүктүрүүгө каралган каражаттын алкагында беш жылда бир дагы мультфильм тартылбаганын айтты.
Мамлекеттик тилди өнүктүрүү боюнча ар беш жылда программа кабыл алынат. Аны ишке ашыруу үчүн 380 миллион сом каралат. Бирок, тилекке каршы, соңку беш жылда мунун алкагында бир дагы мультфильм тартылган эмес. Бул тууралуу Каныбек Осмоналиев Sputnik Кыргызстан радиосуна маек куруп жатып билдирди.
Осмоналиев: эми мультфильм тартууга 23 млн. сом бөлүнөт
Анын айтымында, бөлүнгөн каражат буга чейин формалдык иш-чараларга жумшалып келген.
"Мамлекеттик тилди өнүктүрүүдө мультфильм, кино тартууга олуттуу көңүл бурулуусу зарыл. Бул багытта ар беш жыл сайын концепциясы кабыл алынып турган мамлекеттик программа бар. Аны ишке ашырууга беш жылга 380 миллион сом каралат. Каражат тиешелүү министрликтерге, ЖОЖдорго жана мамлекеттик ЖМКларга бөлүнүп берилет. Бирок буга чейин ал акчага формалдуу түрдө эле иш-чаралар өтүп, тилди өнүктүрүүгө алардын кошкон салымы чабал болгон. Мисалы, балдар үчүн мультфильм тартууга жана башка тилдерден которууга болгону 8 миллион сом чегерилген. Бул абдан аз. Андыктан мындан ары аталган багытка 23 миллион сом бөлүнмөй болду. Биз мамлекеттик тилди өнүктүрөбүз десек жеткинчектерибиздин дүйнө таанымынан башташыбыз керек. Азыр алгачкы кадамдар башталып, кыргыз эл жомокторунун негизинде 80 мүнөттөн турган эки сериялуу анимациялык фильм тартылды. Аны биздин улуттук каналда иштеген өзүбүздүн адистер ишке ашырды. Ушул жылдын май айында элге тартууланат", — деди Осмоналиев.
Ал мультфильмдерди которууда балдардын аң-сезимине жеткирип жаткан идеологиялык багыттарына олуттуу көңүл бурулушу зарылдыгын кошумчалады.
