Жумуш менен эс алууну айкалыштыруудагы башкы 6 эреже
© Sputnik / Владимир Песня
/ Жазылуу
Ден соолукту чыңдоо борбору кызматкер жумасына 40 саат иштеши керектигин эске салды.
БИШКЕК, 18-апр. — Sputnik. Мекемедеги жумуш процесси жамаат максималдуу эффективдүү жана өндүрүмдүүлүктү жоготпой тургандай шартта түзүлүшү керек. Саламаттык сактоо министрлигинин алдындагы Ден соолукту чыңдоо борбору эмгек тартиби жөнүндөгү эрежелерди эске салды.
Анда айтылгандай, иш убактысын рационалдуу пайдалануу менен адистердин келип-кете беришин, жумуш убактысынын текке кетүүсүн, кызматкерлердин жумуштан тажап кетүүсүн, эмгек активдүүлүктүн солгундап кетишин алдын алса болот. Мекемелердеги жумуш ички жоболордон жана эмгек тартибинен турат. Анда кызматкердин иш, дем алуу жана эмгек өргүүсүнүн убактысы так көрсөтүлүшү керек. Эгерде кызматкерлердин иш тартиби жана эс алуусу жалпы тартиптен айырмаланса кызматкер менен макулдашылып, эмгек келишиминде аны жазуу талап.
Жумуш менен эс алууну уюштуруудагы башкы алты эреже:
иш күндөрүнүн жана нөөмөттүн узактыгы нормадан ашпашы керек. Жалпы норма — аптасына 40 саат;
күнүнө төрт сааттан ашык иштеген кызматкерлерге тамактанып алууга убакыт берилет. Ал убакыт жарым сааттан аз эмес, бир сааттан ашык эмес болууга тийиш. Эгерде жумуш процессинен мындайга мүмкүн болбосо кызматкер отурган жеринде шам-шум этип алышына шарт түзүү зарыл;
айрым категориядагы кызматкерлерге атайын тыныгуу керек. Мисалы, кыштын суугунда сыртта иштеген жумушчуларга жылынып алууга да убакыт берилет, алты айга чейинки баласы бар энелер иштеп жаткан болсо аларга баласын эмизүүгө убакыт каралышы кажет. Ал эми эртеден кечке компьютер менен иштегендер болсо көздүн талып кеткенин жазуу үчүн да тыныгуу ала алат;
ар бир жумушчу жумасына бир жолу 42 сааттан кем эмес эс алышы керек;
ар бир кызматкер жылына 28 күндөн кем эмес эмгек өргүүсүнө чыга алат. Ал эмгек өргүүгө кеткен учурда жумуш орду сакталат жана айлыгынын жарымы төлөнөт. Эске алыңыз, эки же андан көп жыл катарынан эмгек өргүүсү берилбесе, кызматкерди эмгек өргүүдөн анын макулдугусуз чакыртып алуу, эмгек өргүүнүн баарын же бир бөлүгүн акчалай компенсацияга алмаштыруу, эгерде мындай аракеттин натыйжасында кызматкерде 28 күндөн аз эмгек өргүү калса бул эреже бузуу болуп саналат.
кызматкерлерди дем алыш күндөрдө жумушка тартуу алардын макулдугу менен гана болушу керек. Бирок өзгөчө абал, өзгөчө кырдаал, авария болуп, анын кесепетин жоюу жана башка ушул сыяктуу учурларда жумушчу жумуш берүүчүнүн айтканы боюнча ишке чыгууга милдеттүү.
