Омокеев: элдин эсинде акын болуп калгым келет
© Sputnik / Асел Акмат
Жазылуу
Акын, педагог, тилчи Улукбек Омокеев кыргыз поэзиясынын азыркы абалына көз чаптырды.
Учурда жаш акындардын элге насаат айтып, акыл үйрөтүп жазган ырлары көбөйдү. Мен өзүм да акын катары өзгөчө жаштардын калемине таандык поэзиялар жандуу болуп, сезим менен жаралса дээр элем. Мындай пикирин Улукбек Омокеев Sputnik Кыргызстан радиосуна маек куруп жатып билдирди.
Омокеев: элдин эсинде акын болуп калгым келет
Анын айтымында, таланты бийик чыгармачыл инсандардын, анын ичинде акындардын көпчүлүгүн коом өз мезгилинде түшүнө албайт.
"Өзүм поэзия дүйнөсүндө аздыр-көптүр эмгек кылып келе жатам. Кесибим боюнча кыргыз тили мугалимимин. 2011-жылдан тарта Ош мамлекеттик университетинде ар кандай кызматтарда иштедим. Мамлекеттик тил боюнча проректорлукка чейин жеттим. Коомдук иштерге активдүү катышып, блог жазып, "Жигер" адабий борборун түзүп, айтор, коомдук иштерге көп эле аралашып жүрөм. Бирок элдин эсинде акын болуп калгым келет. Ошондуктан дагы Ош шаарынан борборго көчүп келип, жеке чыгармачылыгыма көңүл бурайын деп жатам. Байкасам, соңку жылдары өзүм деле жалындуу ырларды көп жазбай калыптырмын. Бул бир чети табигый көрүнүш. Жаш кезиңде курч болосуң, ар кандай маселелерге башкача көз карашта карап, оюңду тартынбай айтасың. Жашоодо кичине бир нерсени билип баштагандан тарта жеке чыгармачылыгыңа карата да өзүңдүн сын көз карашың өсөт экен. Мурдагыдай курч боло албай кетенчиктеп баштайт турбайсыңбы. Ошондуктан да азыркы жаш акындарга жандуу, жалындуу ырларды жазышса деп айтар элем. Анткени өзүм "Жигерди" жетектеп жүрүп да көп байкадым, жакшы ыр жазышат. Түзүлүшү туура, уйкаштык, тагдыр бар, бирок эмнегедир көпчүлүк жаш акындар акыл үйрөтүп, насаат айтканга өтүп алышты. Андан көрө кантип сүйүштү эмес, сүйүүнүн өзүн сүрөттөп жаз, эмнени сезип жатасың, ошону жаз. Белгилүү адабиятчы, сынчы агайыбыз Кадыркул Даутов айткандай, айрым ырларга сезим жетишпейт. Ал эми мындай сезим менен жаралган ырлар 35-40ка чейин эле мыкты жазылат, андан ары кааласаң, каалабасаң да акылга негизделген поэзия жаратасың. Андыктан жаш акындар өз курагындагы дүйнө таанымын колдонуп калышса", — деди Омокеев.
Акын сезими жок ырларды тузу кем тамакка салыштырды.
