Түнкүсүн улуган карышкырлар эсти чыгарып... "Акбаранын көз жашынан" таберик сүрөт
20:11 15.03.2023 (Жаңыртылды: 09:54 31.03.2023)
Жазылуу
Sputnik Кыргызстан маалымат агенттиги архивде сакталып жаткан сейрек сүрөттөрдү жарыялап, тарыхын баяндайт.
© Sputnik /Александр Федоров
Бөлтүрүктү көтөрүп турган белгилүү актер Дүйшөн Байдөбөтов, ортодо казакстандык актриса Рахилям Машурова жана жергиликтүү тургундун сүрөтү 1988-жылы Ош облусунда тартылган.
Ал жылы залкар кинорежиссер Дооронбек Садырбаев жазуучу Чыңгыз Айтматовдун "Кыямат" романынын негизинде "Акбаранын көз жашы" тасмасын тартууга киришкен. Анда Байдөбөтов башкы каарман Базарбайдын, Машурова чабан Бостондун аялы Гүлүмкандын ролун аткарган.
Ошол кезеңди Казакстандын эмгек сиңирген артисти Рахилям Машурова мындайча эскерет:
"Дооронбек Садырбаев 1987-жылы Алматыга келип бизди сүрөткө тартып кеткен. Бир-эки ай өткөндөн кийин үч актерду Бишкекке кинопробага чакырып, бизди Чыңгыз Айтматов да көргөн. Ошентип ал кишинин тандоосу менен мага Бостондун келинчеги Гүлүмкандын ролу тийип калган. Мен негизи ага чейин театрда эле сахнага чыгып жүргөндүктөн, ал кинодогу алгачкы ролум болгон. Биз Ош облусунун Алай районунда колхоздо жашадык. Жергиликтүүлөр бизди кой союп, дасторконун жайып сонун тосуп алган. Тасмадагы эки карышкыр, төрт бөлтүрүктү Россиядан атайын алып келишкен болчу. Карышкырлар түндө айылда катуу улучу, кээде аны угуп жатуу аябай коркунучтуу эле. Чогуу тартылган Советбек Жумадылов, Дүйшөн Байдөбөтов, Жамал Сейдакматова чыгаан таланттар, адамгерчилиги бийик залкар инсандар болгон. Азыр отуруп алып гример, костюмерге чейин баарын эстеп, ошол кубанычтуу күндөргө барып келгендей болуп калам. Мен кесипкөй актриса болгондуктан иш маалында деле кыйынчылыктар болгон эмес. Анан режиссер Дооронбек Садырбаев, жазуучу Чыңгыз Айтматов өзү ишенген соң, Казакстандан бери келгенден кийин уят кылбай өз ишимди жогорку деңгээлде аткарайын деп аракет кылып жүрдүм. Соңунда телефильмди көрүүчүлөр жакшы кабыл алып, бир катар эл аралык фестивалдарга катышты", — деди Машурова.
Азыр актриса Алматы шаарындагы Темирбек Жургенов атындагы Казак улуттук искусство институтунда жаштарды тарбиялап, Мухтар Ауэзов атындагы Казак улуттук театрында иштеп келет.
Аталган фильмдеги негизги окуялар Алайдагы Жошолу тоолорунда жана Казакстандын талааларында болгон.
Тема боюнча:
