Академик: илимди реформалоо зарыл, бирок аны астейдил жүргүзүү керек
© Sputnik / Асель Сыдыкова
Жазылуу
Техника илимдеринин доктору, академик Мурат Жуматаев Улуттук илимдер академиясынын техникалык базасы эскиргенин, илимге бөлүнгөн каражат жетишсиз экенин белгиледи.
Илимди реформалоо зарыл, бирок аны астейдил жүргүзүү керек. Ансыз бул тармакты түп тамырынан жоготуп алуу коркунучу бар. Бул тууралуу Мурат Жуматаев Sputnik Кыргызстан радиосуна маек куруп жатып билдирди.
Академик: илимди реформалоо зарыл, бирок аны астейдил жүргүзүү керек
Анын айтымында, академиянын институттарын ЖОЖдорго өткөрүү жакшы натыйжа бербей калышы ыктымал.
"Илимди реформалоо боюнча кептер 90-жылдардан бери айтылып келе жатат. Бирок реформа дегенде эле Улуттук илимдер академиясы тууралуу сөз болууда. Анткени ЖОЖдордо учурда илим дээрлик жок. Маселен, батышта профессор жылына 100-200 саат сабак берип, калган убактысын илимге бөлөт. Ал эми бизде окумуштуулар жылына миң саат лекция окуйт. Башкача айтканда, күнүнө үч саат кетет. Анан кайдагы илим тууралуу айтууга болот? Мисалы, Улуттук илимдер академиясына 300 миллион сомдун тегерегинде бөлүнөт. Анын 60-70 пайызы маянага кетет. Илимдин докторлору 10 миң сомдон айлык алууда. Андан тышкары, жабдыктардын көпчүлүгү 80-жылдарга таандык. Мына ушундай жагдайда илимий ачылыштар дээрлик болбойт. Илимди ЖОЖдорго интеграция кылуу зарыл, бирок аны астейдил жүргүзүү керек. Ошондуктан алгач сынамык иретинде ЖОЖго эки институт берилүүдө. Жыйынтыгын карап, ошого жараша иш алып баруу зарыл", — деди Жуматаев.
Ошондой эле ал ЖОЖдор илимге каражат жумшабай жатканына нормативдик шарттардын түзүлө электиги себеп экенин кошумчалады.
